لفظوں کی دوڑ میں ماں ، باپ سے آگے!

برٹش کونسل کی سترہویں سالگرہ کے موقع پر کئے جانے والے اس سروے میں ایک سو دو ممالک سے چالیس ہزار سے زیادہ افراد نے حصہ لیا۔

خوبصورت ترین الفاظ کے انتخاب میں پہلی پانچ پوزیشنوں پر مدر (ماں)، پیژن (جذبہ)، سمائل (مسکراہٹ)، لو (محبت) اور ایٹرنیٹی ( ابدیت) لیکن لفظ فادر (باپ) پہلے ستر الفاظ کی فہرست تک بھی نہیں پہنچ پایا۔

اس کے علاوہ پہلے دس الفاظ کی فہرست میں فینٹیسٹک (شاندار) ، ڈیسٹینی (مقدر) ، فریڈم (آزادی) ، لبرٹی (آزادی) اور ٹرینکوالیٹی (سکون) شامل ہیں۔

برٹش کونسل پوری دنیا میں انگریزی زبان کو پروموٹ کرتی ہے اور ہر سال تقریباً پانچ لاکھ لوگوں کو زبان سکھاتی ہے۔ کونسل کے ایک ترجمان کرس ویڈ کا کہنا ہے کہ سب سے زیادہ پسند کئے گئے الفاظ میں سے زیادہ تر مثبت معنی والے الفاظ ہیں۔

سب سے زیادہ پسند کئے جانے والے لفظ یعنی مدر کے بارے میں انہوں نے کہا کہ ’ظاہر ہے ہم سبھی کی ایک ماں ہوتی ہے اور ہماری زندگیوں میں وہ ایک اٹل حقیقت کی طرح ہوتی ہے اور پھر بہت سے سماجوں میں اس لفظ کی بہت زیادہ اہمیت ہے لیکن میں یہ سوچتا ہوں کہ اگر اس طرح کا سروے برطانیہ میں کیا جائے تو نتیجہ کیا رہے گا۔‘