دو نئے ٹی وی پینل: ایک کو لپیٹ لیں اور دوسرا شفاف

جنوبی کوریا کی الیکٹرانکس کمپنی ایل جی نے اعلان کیا ہے کہ وہ دو کاغذ جتنے پتلے ٹی وی پینل بنا رہی ہے جن میں سے ایک اتنا لچکدار ہے کہ اس کو لپیٹا جاسکتا ہے۔

ایل جی کے بقول اس لچکدار ٹی وی پینل کو جب لپیٹا جائے گا تو یہ تین سینٹی میٹر قطر کی ٹیوب بن جائے گی۔

ایل جی کا کہنا ہے کہ 2017 تک 60 انچ کا الٹرا روک ایبل ٹی وی مارکیٹ میں لے آئیں گے۔

ایل جی نے اس سال کے شروع میں اپنا پہلا لچکدار ٹی وی سیٹ تجارتی میلے پر پیش کیا تھا۔

ایل جی کے نئے لچکدار پینل کی روزولیوشن 1200x810 ہے اور اس کو تین سینٹی میٹر قطر کی ٹیوب میں لپیٹنے کے بعد بھی اس میں کوئی فرق نہیں پڑتا۔

ایل جی نے کہا کہ اس ٹی وی پینل میں لچک اس لیے ممکن ہو سکی کہ اس میں پلاسٹک نہیں بلکہ پولیمائیڈ فلم استعمال کی گئی ہے۔

ایل جی کی جانب سے دوسرا پینل شفاف ہے جس کی وجہ سے تصویر کی دھندلاہٹ میں 30 فیصد کمی واقع ہوئی ہے۔

سٹف ڈاٹ ٹی وی کے آن لائن ڈپٹی ایڈیٹر سٹیون گریوز کا کہنا ہے: ’لچکدار سکرین ایک اہم ایجاد ہے۔ یہ باقی ٹی وی سیٹس سے زیادہ پائیدار ہو گی۔ اس کا مطلب یہ ہے کہ جلد ہی ایسی بہترین سکرینیں بنائی جائیں گی جس کا استعمال جہازوں میں بھی ہوگا۔ اس ٹیکنالوجی کے باعث ہم کئی نئی ایجادات دیکھ سکیں گے۔ سوچیں دس انچ کا آئی پیڈ جس کو آپ کھولیں تو اس کی سکرین 16 انچ کی ہو جائے۔‘

وائرڈ رسالے کے پروڈکٹ ایڈیٹر جیریمی وائٹ کا کہنا ہے کہ ’ان لچکدار اور شفاف ٹی وی سکرینیں کی جب نمائش ہو تو یہ ناظرین کو اپنی طرف متوجہ کریں گی۔‘