شمالی امریکہ میں ریکارڈ سردی تو سڈنی میں 79 سال بعد ریکارڈ گرمی
،تصویر کا ذریعہALLSPORT/GETTY IMAGES
ایک طرف اگر شمالی امریکہ میں ریکارڈ سردی پڑ رہی ہے تو دوسری طرف آسٹریلیا کے شہر سڈنی میں گذشتہ 79 سال میں گرم ترین دن ریکارڈ کیا گیا ہے۔
سڈنی کا درجۂ حرارت اتوار کو 47.3 سینٹی گریڈ درج کیا گیا۔
شدید گرمی کی وجہ ہزاروں افراد بجلی کے بغیر رہ رہے ہیں جبکہ امدادی ادارے بے گھر افراد کو پانی فراہم کر رہے ہیں۔
یہ بھی پڑھیے
سڈنی کے مغرب پینرتھ علاقے میں رہائشیوں نے سب سے زیادہ گرمی کی شدت محسوس کی۔
سڈنی کے وسیع تر علاقے میں آتشزدگی کا سخت انتباہ جاری کیا گیا اور شہر میں آگ جلانے پر مکمل پابندی عائد کر دی گئی ہے۔
اتوار کا درجۂ حرارت سنہ 1939 کے ریکارڈ کردہ 47.8درجۂ حرارت سے ذرا پیچھے رہ گیا۔
End of سب سے زیادہ پڑھی جانے والی
،تصویر کا ذریعہReuters
بیورو آف میٹرولوجی نے تصدیق کی کہ دن کا گرمی سے نڈھال کر دینے والا درجۂ حرارت پینرتھ میں ریکارڈ کیا گیا۔
ادھر امریکہ کی نیشنل ویدر سروس کے مطابق امریکہ اور کینیڈا کے بعض علاقوں میں درجۂ حرارت منفی 29 ڈگری تک گر سکتا ہے۔
طوفان کے سبب اٹھنے والی اونچی اونچی لہریں جو نیو انگلینڈ کے ساحلی حصوں میں سیلاب کا سبب بن گئی تھیں وہ منجمد ہو گئی ہیں۔
اطلاعات کے مطابق اس شدید موسم میں ابھی تک امریکہ میں 19 افراد ہلاک ہو چکے ہیں جبکہ کینیڈا میں مرنے والوں کی تعداد دو ہے۔
شمالی اور جنوبی کیرولینا میں چار اموات ٹریفک حادثات کے سبب ہوئیں جبکہ باقی اموات وسکانسن، کنٹکی اور ٹکسس میں ہوئیں۔
فلاڈلفیا میں ایک کار ایک ڈھلان پر نہ رک سکی اور وہ ایک ٹرین سے جا ٹکرائي جس میں کار میں سوار شخص کی موت ہو گئی۔
،تصویر کا ذریعہGetty Images
دوسری جانب ایشز سیریز کے پانچویں آخری ٹیسٹ میں انگلینڈ کے کھلاڑی آسٹریلیا کے بالروں کے ساتھ ساتھ گرمی سے بھی بے حال ہو رہے تھے۔ یہ آسٹریلیا میں کسی بھی ٹیسٹ میچ کے دوران سب سے زیادہ گرم دن ریکارڈ کیا گیا ہے۔
سڈنی انٹرنیشنل ٹینس ٹورنامنٹ میں شرکت کرنے والے کھلاڑیوں کو منتظمین نے مقامی وقت کے مطابق دس بجے اس وقت رخصت کردیا جب درجۂ حرارت 40 سینٹی گریڈ سے تجاوز کر گیا۔
فرانس کی کرسٹینا ملادینووچ نے آسٹریلیا کی ایلن پیریز کے ساتھ میچ میں کھیل کے درمیان ریٹائر ہونے کے بعد معذرت کی۔
انھوں نے اپنے ٹوئٹر پیغام میں لکھا کہ ’43 ڈگری ہے لیکن جب شروع ہوا تو کورٹ میں شاید 50 ڈگری تھا۔ میں مداحوں سے معذرت کرتی ہوں۔ میرے خیال میں یہ میرے کیریئر میں پہلی مرتبہ ہوا ہے کہ میں میچ سے ریٹائر ہوئی ہوں۔
،تصویر کا ذریعہAFP
صحافی جیمی پیندارام نے بھی ٹوئٹر پر لکھا کہ گرمی کی وجہ سے فوٹوگرافرز اپنا کام نہیں کر سکتے تھے۔
اتوار کو گریٹر سڈنی کے علاقوں میں آگ پر پابندی لاگو کر دی گئی تھی تاکہ جنگل کی آگ کے خطرے سے بچا جا سکے، جو کہ آسٹریلیا میں گرمیوں کے دوران ایک معمول ہے۔
