یہ پہلا موقع ہے کہ فیڈرل ریزرو کے چئرمین نے اس نوع کے اضافی اخراجات کی حمایت کی ہے۔

انہوں ایوانِ نمائندگان کی بجٹ کمیٹی کو بتایا ہے کہ نئے متحرکات کا ایک ایسا دور اچھا ثابت ہو سکتا ہے جس سے زائد گھریلو اخراجات کی حوصلہ افزائی ہو۔

یہ پہلا موقع ہے کہ فیڈرل ریزرو کے چئرمین نے اس نوع کے اضافی اخراجات کی حمایت کی ہے۔ انہوں نے کہا ہے کہ اس مرحلے پر ’کانگریس کی جانب سے ایک مالیاتی پیکیج پر غور مناسب دکھائی دیتا ہے لیکن اس کے ساتھ ساتھ کانگریس کو پیداوار بڑھانے کے لیے قرضوں تک رسائی کو بہتر بنانے اور روزگار کے مواقع بڑھانے کے اقدام پر بھی غور کرنا چاہیے‘۔

ان کا کہنا ہے کہ اگر یہ اقدام نہ کیے گئے تو معیشت کو سست کرنے والے عوامل مزید گہرے اثرات مرتب کریں گے۔

دوسری طرف عالمی ادارہِ محنت نے متنبہ کیا ہے کہ عالمی مالیاتی بحران کے نتیجے میں آئندہ سال کے آخر تک دو کروڑ لوگ بے روزگار ہو جائیں گے۔ آئی ایل او نے یہ پیش گوئی بھی کی ہے کہ غربت زدہ لوگوں کی تعداد میں مزید چار کروڑ افراد کا اضافہ ہو گا۔