مسٹر کِم جونگ اِل کے بارے میں یہ افواہیں گردش کرتی رہی ہیں کہ ان پر فالج کا حملہ ہوا ہے اور وہ شدید بیمار ہیں۔

شمالی کوریا کے ذرائع ابلاغ کے مطابق مسٹر کِم جونگ اِل نے سنیچر کے روز شمالی کوریا کے درالحکومت پیونگ یانگ میں طلباء کے درمیان ہونے والے ایک فٹ بال میچ میں شرکت کی۔

شمالی کوریا کہ چھیاسٹھ سالہ رہنما کو اگست کے وسط سے نہیں دیکھا گیا تھا۔ امریکی اور جنوبی کوریا کہ حکام کا کہنا تھا کہ ان پر فالج کا حملہ ہوا ہے اور ان کے دماغ کا آپریشن ہوا ہے۔

مسٹر کم جونگ ال نے نو ستمبر کو شمالی کوریا کے قومی دن کے موقع پر ہونے والی پریڈ میں بھی شرکت نہیں کی تھی۔ تاہم شمالی کوریا کے حکام میں ان خبروں کی تردید کی تھی کہ وہ بیمار ہیں۔

شمالی کوریا کے سرکاری خبر رساں ادارے کے مطابق مسٹر کم جونگ ال نے شمالی کوریا کے بانی اور اپنے والد کے نام پر بننے والی کم ال سنگ یونیورسٹی کی باسٹھویں سالگرہ کے موقع پر ہونے والے ایک فٹ بال میچ کو دیکھا۔

رپورٹ میں یہ نہیں بتایا گیا کہ یہ میچ کب ہوا تھا۔ تاہم یہ معلوم ہوا ہے کہ یونیورسٹی کی سالگرہ یکم اکتوبر کو ہوتی ہے۔

ابھی تک کسی بھی شخص کو مسٹر کم جونگ ال کا جانشین مقرر نہیں کیا گیا ہے۔

مسٹر کم جونگ ال کی علالت کی خبریں ایک ایسے موقع پر سامنے آئی تھی جب شمالی کوریا کے جوہری پروگرام پر ہونے والے مذاکرات اہم مرحلے سے گزر رہی ہیں۔

گزشتہ سال شمالی کوریا نے مالی امداد اور سفارتی مراعات کے بدلے اپنے جوہری پروگرام کو ختم کرنے پر رضا مندی ظاہر کی تھی۔ تاہم حالیہ مہینوں میں یہ معاہدہ ٹوٹتا دکھائی دیتا ہے۔