لڑائی کے ساتھ ساتھ خوراک کی بڑھتی ہوئی قیمتوں نے بھی مشکل بڑھا دی ہے

ایک سو مختلف غیر سرکاری تنظیموں کی طرف سے جاری ہونے والے ایک بیان میں کہا گیا ہے کہ گزشتہ سال کے مقابلے میں اس سال مزاحمت کاروں کے حملوں میں پچاس فیصد اضافہ ہوا ہے۔

بیان میں کہا گیا ہے کہ امدادی کام کرنے والی تنظیموں پر حملوں میں اضافہ ہوا ہے۔

امداد کی ضرورت  افغانستان کو خشک سالی کا سامنا ہے اور اس صورتحال میں امدادی ایجنسیوں کا کام انتہائی اہم ہے میٹ والڈمین

بیان میں کہا گیا ہے کہ اس سال اب تک غیر سرکاری تنظیموں کے انیس افراد ہلاک ہوئے ہیں جو کہ طالبان حکومت کے خاتمے کے بعد سے کسی ایک سال میں امدادی کارکنوں کی ہلاکت کی سب سے بڑی تعداد ہے۔

بیان میں لڑائی میں شہریوں کی بڑھتی ہوئی ہلاکتوں کو بھی تنقید کا نشانہ بنایا گیا ہے۔ غیر سرکاری تنظیموں نے زیادہ تر ہلاکتوں کے لیے مزاحمت کاروں کو ذمہ دار ٹھہرایا ہے لیکن ساتھ ہی انہوں نے کہا ہے کہ بین الاقوامی افواج بھی ان کی ذمہ دار ہیں جنہوں نے فضائی طاقت کا استعمال بڑھا دیا ہے۔

آکسفیم انٹرنیشنل کے پالیسی سازی کے مشیر میٹ والڈمین نے کہا کہ افغانستان کو خشک سالی کا سامنا ہے اور اس صورتحال میں امدادی ایجنسیوں کا کام انتہائی اہم ہے۔