اوبامہ امریکی عوام کو یقین دلانے کے لیے کہ وہ خارجہ پالیسی کو چلانے کی صلاحیت رکھتے ہیں، ملک سے باہر نکلے ہیں

باراک اوباما ’جو کہ ایک سینیٹر کی حیثیت سے غیر ملکی دورہ کر رہے ہیں، اعلیٰ عراقی حکام، فوجی قائدین اور امریکی سفارت کاروں سے ملاقات کریں گے۔

وہ عراق میں کام کرنے والے دوسرے اہلکاروں سے بھی ملاقات کریں گے۔

اس سے قبل اتوار کے روز اپنے افعانستان کے دورے کے دوران انہوں نے کہا تھا کہ ’اگر وہ صدر منتخب ہوگئے تو وہ اپنی ساری توجہ افغانستان میں القاعدہ کے خلاف جنگ پر مرکوز کریں گے۔

انہوں نے امریکی ٹی وی چینل سی بی ایس کو انٹرویو دیتے ہوئے کہا تھا کہ افغانستان میں دہشت گردی کے خلاف جنگ میں اتحادی افواج کو طالبان جنگجؤوں کی طرف سے بڑھتے ہوئے حملوں کا سامنا ہے، وہاں’ہنگامی اور فوری اقدامات، کی ضرورت ہے۔‘

باراک اوباما نے افغانستان کے دارالحکومت کابل میں اپنے دورے کے دوران اس سلسلے میں صدر حامد کرزئی سے ملاقات کی تھی۔

ڈیموکریٹ پارٹی کے امیدوار باراک اوباما امریکی عوام کو یقین دلانے کے لیے کہ وہ خارجہ پالیسی کو چلانے کی صلاحیت رکھتے ہیں، ملک سے باہر نکلے ہیں۔

باراک حسین اوباما اپنے غیر ملکی دورے کے دوران افغانستان، عراق، اردن، اسرائیل، جرمنی، فرانس اور برطانیہ بھی جائیں گے۔

باراک اوباما نے دورے سے قبل کہا تھا کہ بش انتظامیہ نے دہشگردی کےخلاف جنگ کے دوران اپنی توجہ ایک اور ایسی جنگ پر مرکوز کر لی جس سے بچا جا سکتا تھا۔

اوبامہ نے کہا کہ وقت آ گیا ہے کہ بش انتظامیہ کی غلطی کی تلافی کی جائے۔

باراک اوباما نے افغانستان کے دروے سے قبل سی این این کے ساتھ ایک انٹرویو میں افغانستان کے صدر حامد کرزئی کو تنقید کا نشانہ بناتے ہوئے کہا تھا کہ کرزئی حکومت ابھی تک بنکر سے باہر نہیں نکلی ہے اور اس نے ملکی اداروں کو مضبوط کرنے میں کوئی کامیابی حاصل نہیں کی ہے۔

اس دورے پر باراک اوباما کے ساتھ امریکی ٹی وی چینلوں کی پوری ٹیم سفر کر رہی ہے۔ حامد کرزئی سے دو گھنٹوں کی ملاقات کے بعد باراک اوباما نے ذرائع ابلاغ سے کوئی بات نہیں کی۔