راکٹ سدروت میں ایک گھر کے عقبی باغیچہ میں گرا

غزہ میں اسرائیل اور حماس نے جون کی انیس تاریخ سے جنگ بندی شروع کی تھی جس کا مقصد غزہ میں اسرائیلی جارحیت اور غزہ سے اسرائیل کے جنوبی علاقوں پر راکٹ حملے روکنا تھا۔

غزہ سے پھینکنے جانے والے ان دو راکٹوں سے سدروت میں کوئی جانی نقصان تو نہیں ہوا تاہم اسرائیل کا کہنا ہے کہ وہ اب غزہ پر دوبارہ اقتصادی پابندیاں عائد کر سکتا ہے۔

اسلامک جہاد تنظیم نے راکٹ حملوں کی ذمہ داری قبول کرتے ہوئے کہا ہے کہ یہ حملے مغربی کنارے پر اسرائیلی جارحیت کا جواب ہے جس میں دو فلسطینی مارے گئے تھے۔ واضح رہے کہ اس جنگ بندی کا اطلاق مغربی کنارے پر نہیں ہے۔

اسلامک جہاد کے مطابق نابلوس میں اسرائیلی فوجیوں نے جنگ بندی توڑتے ہوئے جارحانہ کارروائی کے دوران تنظیم کے ایک کا اہم عسکریت پسند اور ایک عام فلسطینی ہلاک کیا۔

جنگ بندی کے آغاز پر بھی اسلامک جہاد کے سینئر رہنما نے بی بی سی کو بتایا تھا کہ ان کی تنظیم جنگ بندی کی خلاف ورزی نہیں کرے گی لیکن کسی بھی حملے کی صورت میں جوابی کارروائی کا حق رکھتی ہے۔

حماس اور اسرائیل کے درمیان ہونے والی جنگ بندی کے پہلے مرحلے میں دو طرفہ جارحانہ کارروائیوں کی روک تھام اور غزہ کی سرحد کو جزوی طور پر کھولنا شامل ہے جبکہ دوسرے مرحلے میں اسرائیلی فوجی گلاد شالت کی رہائی اور مصر کے ساتھ رفاع کراسنگ کھولنے جیسے اقدامات شامل ہیں۔

اسرائیل نے جنگ بندی کی کامیابی کے لیے تین شرائط رکھی ہیں۔ ان شرائط میں کارروائیوں کا مکمل خاتمہ، مصر سے اسلحہ کی غزہ سمگلنگ کی بندش اور اسرائیلی فوجی گلاد شالت کی رہائی میں پیشرفت شامل ہیں۔

جنگ بندی کے آغاز پر حماس کے حکام نے کہا تھا کہ انہیں یقین ہے کہ غزہ میں موجود تمام عسکریت پسند تنظیمیں مصر کی کوششوں سے ہونے والی جنگ بندی کا احترام کریں گے۔ حماس کا کہنا ہے کہ اسے کو امید ہے کہ جنگ بندی سے اسرائیل سے غزہ میں داخلے کے مزید راستے کھولے جائیں گے۔ انہوں نے کہا کہ اب مقصد قیدیوں کی رہائی کا ہے اور حماس اور فتح کے مابین نئی بات چیت کا ہے۔