پارٹی نے قواعد و ضوابط کی خلاف ورزی کی وجہ سے ان دونوں ریاستوں سے امیدوار منتخب کرنے کے عمل میں شامل ہونےکاحق چھین لیا تھا

ان دو ریاستوں سے ڈیموکریٹک مندوبین کو صدارتی امیدوار کے انتخاب میں شامل کرنے کا فیصلہ سنیچر کے روز پارٹی کی رولز کمیٹی کے ایک اجلاس میں کیا گیا۔

رولز کمیٹی کے فیصلے کے مطابق فلوریڈا اور مشیگن کے رکن اگست میں ہونے والے سالانہ پارٹی کنونشن میں شامل تو ہو سکتے ہیں لیکن ان کا ووٹ آدھا ہو گا۔

اس سے پہلے پارٹی نے قواعد و ضوابط کی خلاف ورزی کی وجہ سے ان دونوں ریاستوں سے امیدوار منتخب کرنے کے عمل میں شامل ہونےکاحق چھین لیا تھا۔

فلوریڈا اور مشیگن میں قواعد کی خلاف ورزی کرتے ہوئے جنوری میں ووٹنگ کروائی گئی تھی اور انہیں سزا دینے کے لیے پارٹی کی قومی قیادت نے فیصلہ کیا تھا کہ اِن دونوں ریاستوں کے نتائج حتمی نتائج میں شامل نہیں کیے جائیں گے۔

ہلری کلنٹن چاہتی تھیں کہ ڈیموکریٹک پارٹی اپنا فیصلہ بدل دے گی کیونکہ انہیں ان ریاستوں میں کافی حمایت حاصل ہے اور پارٹی کی رولز کمیٹی کا یہ فیصلہ ان کے لیے ایک دھچکا قرار دیا جا رہا ہے۔ ان دونوں ریاستوں کے نتائج کے مطابق وہاں ہلری کلنٹن کو زیادہ ووٹ ملے تھے۔ وہ صدارتی امیدوار کی دوڑ میں اس وقت تک اپنے مخالف بارک اوباما سے پیچھے ہیں اور یہ مہم آخری مراحل میں داخل ہو چکی ہے۔

یہاں یہ بات قابل ذکر ہے کہ کلنٹن نے اور نہ ہی اوباما نے وہاں انتخابی مہم چلائی اور مشیگن میں تو اوباما کا نام بھی بیلٹ پیپر پر نہیں تھا۔

واشنگٹن میں بی بی سی کے نامہ نگار کا کہنا ہے کہ اس فیصلے سے ہلیری کلنٹن کے لیے صورت حال قدرے بہتر تو ہو جائے گی لیکن باراک اوبامہ کی کامیابی خطرے میں نہیں پڑے گی۔