سری لنکا میں انیس تراسی سے لڑائی جاری ہے

فوجی حکام نے مزید کہا کہ مہامالی کے علاقے میں بھی شدید لڑائی میں ستر فوجی زخمی ہو گئے تھے۔

سری لنکا میں ہونے والی ان ہلاکتوں کی آزاد ذرائع سے تصدیق نہیں ہو سکی ہے۔

حکومت نے کہا ہے کہ باغیوں کے ساتھ دو ہزار دو میں ہونے والی جنگ بندی کو باغیوں نے اسلحہ حاصل کرنے اور اپنے آپ کو منظم کرنے کے لیے استعمال کیا ہے۔ حکومت نے دعوی کیا ہے کہ وہ اس سال کے آخر تک انہیں مکمل طور پر کچلنے کے لیے تیار ہیں۔

سری لنکا میں انیس سو تراسی میں شروع ہونے والی خانہ جنگی میں ستر ہزار کے قریب افراد ہلاک ہو چکے ہیں۔

سری لنکا فوج کے ترجمان بریگیڈیئر اودھے ننیاکارا نے بی بی سی کو بتایا کہ بدھ کی صبح شروع کی جانے والی اس کارروائی میں دو ڈویژن فوج نے حصہ لیا۔

جزیرہ نما جافنا میں باغیوں کے زیر کنٹرول علاقے میں جب فوج داخل ہوئے اس پر تامل باغیوں نے حملہ کر دیا۔

بریگیڈیئر ننیاکارا نے کہا کہ سرکاری فوجی آٹھ کلو میٹر وسیع محاذ پر پانچ سو میٹر تک باغیوں کو پیچھے دھکلتے ہوئے اندر داخل ہو گئیں۔

انہوں نے کہا کہ اب تامل فوج ان علاقوں میں اپنے مورچے مستحکم بنانے کی کوشش کر رہی ہے۔’

باغیوں کی ایک ویب سائٹ نے باغیوں کی شمالی کمانڈ کے حوالے سے دعوی کیا ہے کہ سرکاری فوج کو بھاری جانی نقصان اٹھانا پڑا ہے اور وہ لاشیں چھوڑ کر پسپا ہو گئے ہیں۔

اس ویب سائٹ نے کہا ہے کہ باغیوں کی طرف سے اسپیشل کمانڈوز نے بھی اس لڑائی حصہ لیا جس میں سری لنکا کی فوج نے ٹینکوں اور ملٹی بیرل راکٹ لانچروں کی مدد سے پیش قدمی کی کوشش کی۔

اسی علاقے میں منگل کو ہونے والی جھڑپوں کے بعد باغیوں نے دعوی کیا تھا کہ انہوں نے ایک ٹینک کو بھی تباہ کر دیا تھا۔