ابھی تک یہ واضح نہیں ہے کہ بصرہ میں سیکیورٹی فورسز اور مہدی آرمی میں سے کون بہتر پوزیشن میں ہے۔

اب تک ان جھڑپوں میں چھیالیس افراد کے ہلاک ہونے کی اطلاع ہے۔

یہ جھڑپیں عراق کے جن دوسرے حصوں تک پھیل گئی ہیں ان میں بغداد میں واقع صدر سٹی شامل ہے۔ بغداد کے محفوظ ترین علاقے گرین زون میں راکٹ داغے جانے کے بعد ہلاکتوں کی اطلاعات ہیں۔

گرین زون میں پانچ عراقی شہری ہلاک اور تین امریکی شدید زخمی ہوئے ہیں۔

اطلاعات کے مطابق عراقی وزیر اعظم نوری المالکی مہدی آرمی کے خلاف شروع کیے جانے والی کارروائی کی نگرانی کے لیے بصرہ پہنچ چکے ہیں۔ نوری المالکی نے مسلح جنگجوؤں کو ہتھیار ڈالنے کے لیے بہتر گھنٹوں کی مہلت دی ہے اور کہا ہے کہ بصورت دیگر ان سے سختی سے نمٹا جائے گا۔

طبی امداد فراہم کرنے والے اہلکاروں کا کہنا ہے کہ اب تک چھیالیس لوگ ہلاک اور دو سو پچیس زخمی ہوچکے ہیں۔ بصرہ کی شہری کونسل کے ایک رکن کا کہنا ہے کہ شہری ہلاکتوں کی تعداد بہت کم ہے کیوں کہ لوگ اپنے گھروں تک محدود ہیں۔

بصرہ مہددی آرمی کا گڑھ سمجھا جاتا ہے۔ مہدی آرمی نے حکومت کو خبردار کیا تھا کہ اگر ان کے ارکان کے خلاف کوئی کارروائی کی گئی تو وہ اس کا بھرپور جواب دیں گے۔

بصرہ میں حکام نے سیکورٹی کی بگڑتی ہوئی صورت حال کے پیش نظر کرفیو نافذ کر دیا ہے۔ اس کے علاوہ کُٹ، سماوا، نصریہ، ہلہ اور دیوانیاہ میں بھی کرفیو نافذ کر دیا گیا ہے۔

برطانوی افواج جنہوں نے شہر کا انتظام گزشتہ سال دسمبر میں عراقی حکومت کے حوالے کر دیا تھا کا کہنا ہے کہ وہ عراقی حکومت کی طرف سے شروع کی جانے والی کارروائی کا حصہ نہیں ہیں۔ تاہم اتحادی افواج کے لڑاکا طیارے شہر کی فضا میں گشت کر رہے ہیں۔

مقتدہ الصدر کے حامیوں کا کہنا ہے کہ اس آپریشن کا مقصد اکتوبر کے صوبائی انتخابات سے قبل انہیں کمزور کرنا ہے۔ بی بی سی کے راجر ہارڈی کا کہنا ہے کہ المالکی کی حکمتِ عملی خطرناک ثابت ہوسکتی ہے۔

بی بی سی کے نامہ نگاروں کے مطاق اگر مقتدہ الصدر کی جانب سے پچھلے ایک برس سے جاری سیز فائر پر عمل درآمد ختم کر دیاگیا تو اس سے عراقی حکومت اور بش انتظامیہ کے ان دعووں کی کوئی حیثیت نہیں رہے گی کہ عراق میں خانہ جنگی کا خاتمہ ہورہا ہے اور ملک اب سیاسی مفاہمت کی طرف روانہ ہے۔