حالیہ شہری ہلاکتوں میں اضافے کی وجہ دو حملوں کو قرار دیا جا رہا ہے

متعدد عراقی وزارتوں کے اعداد و شمار کے مطابق کم از کم 633 شہری ہلاک ہوئے تاہم یہ تعداد اس سال جنوری میں ہونے والی 460 ہلاکتوں سے زیادہ ہے۔

ہلاکتوں کی تعداد میں اضافے کی بنیادی وجہ بغداد اور کربلا کے قریب ہونے والے دو حملے ہیں جس میں کم از کم ایک سو پچاس افراد ہلاک ہوئے۔

خبر رساں ادارے رائٹرز کے مطابق ہلاکتوں میں اچانک اضافے نے چھ ماہ کے دوران ہونے والی کم ہلاکتوں کے رحجان بدل دیا ہے تاہم اس سال فروری میں ہونے والی ہلاکتوں کی تعداد اب بھی گزشتہ سال فروری میں سولہ سو پینتالیس شہریوں کی ہلاکتوں کے مقابلے میں کم ہے۔

خبر رساں ادارے اے ایف پی کے مطابق فروری دو ہزار چھ میں عراق کے علاقے سمارا میں شیعوں کے مقدس مقام پر ہونے والی بمباری نے تشدد کی لہر کو جنم دیا تھا جس کے بعد ہونے والے تشدد کے واقعات کے دوران جنوری دو ہزار سات میں 1992 شہری ہلاک ہوئے۔

شہری ہلاکتوں کی تعداد میں کمی کا سہرا عراق میں امریکی فوجی دستوں کی تعداد میں بڑھوتی، شعیہ ملیشیا مہدی آرمی کے سیز فائر اور آس پاس واقع سنی عرب علاقوں میں سکیورٹی یونٹ میں اضافے کو دیا جا رہا ہے۔

یکم فروری کو بغداد میں ہونے والے دو حملے دارالحکومت میں کئی ماہ کے دوران ہونے والے حملوں میں سب سے مہلک ثابت ہوئے۔ ابتداء میں ان حملوں کی ذمہ داری ذہنی طور پر معذور دو خواتین پر ڈالی گئی تھی۔ بعدازاں امریکی فوجی حکام نے بتایا کہ حملے کرنے والی خواتین کا قبل ازیں نفسیاتی علاج کیا گیا تھا۔

عراق میں شدت پسند تنظیم القاعدہ کے گداگروں اور ذہنی طور ہر معذور افراد کو تنظیم میں بھرتی کیے جانے کے خدشات کے بعد عراقی سکیورٹی فورسز کو بغداد کی گلیوں میں پھرنے والے گداگروں اور ذہنی طور ہر معذور افراد کو حراست میں لینے کے احکامات جاری کیے گئے تھے۔

تیسرا خودکش حملہ چوبیس فروری کو بغداد کے جنوب میں سکندریہ میں
اس وقت ہوا جب شیعہ زائرین مذہبی تہوار میں شرکت کے لیے کربلا جارہے تھے۔ اس حملے میں پچاس شیعہ زائرین ہلاک ہوئے۔