پولیس اہلکاروں زخمیوں کو پانچ مختلف ہسپتالوں میں پہنچایا

جمعہ کی صبح ساڑھے دس بجے کے قریب مویشیوں کی ایک مشہور منڈی میں ہونے والے دھماکے کے بارے میں کہا جا رہا کہ یہ خاتون خود کش حملہ آور کی کارروائی تھی۔

دوسرا دھماکہ اس کے محض بیس منٹ بعد شہر کے مشرقی علاقے کے ایک مصروف بازار میں ہوا۔

اس سے قبل گزشتہ برس یکم اگست کو تین کار بم دھماکوں میں اسّی سے زیادہ افراد ہلاک ہو گئے تھے۔

غضیل کے علاقے میں مویشیوں کی منڈی میں کیے جانے والے خود کش حملے میں کم سے کم چالیس افراد ہلاک اور اسّی زخمی ہوئے۔ یہ ہفتہ وار مویشی منڈی جمعے کو لگتی ہے اور گزشتہ سال میں دو دھماکے ہونے کے باوجود یہاں لوگوں کی بھیڑ رہتی ہے۔

دھماکے کے بعد پولیس اہلکاروں اور امدادی عملے نے زخمیوں اور ہلاک ہونے والوں کو ریڑھیوں، کاروں اور پِک اپ ٹرکوں میں ڈال کر بغداد کے پانچ مختلف ہسپتالوں میں پہنچایا۔

دوسرا دھماکہ بغداد کے علاقے جدیدہ میں ہوا جس میں دس افراد ہلاک اور کم سے کم تیس زخمی ہوئے۔

ایک ہسپتال کے ذرائع نے بتایا کہ ان کے ہاں کم سے کم تیس لاشیں پہنچائی گئی ہیں۔ اہلکار کا کہنا تھا ’ یہاں تباہی پھیلی ہوئی ہے، لاشیں گِنی نہیں جا رہیں۔‘