دسبمر میں بھی طالبان کی جانب سے دو خود کش حملے کیے گئے تھے

وزارتِ داخلہ کے مطابق حملہ آور نے سٹی سنٹر کے نزدیک فوج کی گاڑی کو اپنا نشانہ بنایا۔

پولیس کا کہنا ہے کہ دھماکے سے فوج کی گاڑی اور نزدیک سے گزرتی ہوئی ایک ٹیکسی کو نقصان پہنچا ہے۔ وزارتِ داخلہ کے مطابق امکان ہے کہ دھماکہ خیز مادہ طے شدہ وقت سے پہلے پھٹ گیا تھا۔

جمعرات کو ہونے والے خود کش حملے کے عینی شاہد محمد شریف نے بتایا کہ وہ نزدیکی مسجد میں بیٹھے ہوئے تھے جب انہوں نے ایک زوردار دھماکہ سنا۔

محمد شریف نے خبر رساں ایجنسی اے ایف پی کو بتایا ’میں وہاں سے بھاگا۔ چوراہے پر کھڑی پولیس نے ہوا میں گولیاں چلانی شروع کر دیں۔ میں نے دیکھا ایک شخص سڑک پر اپنی سائیکل کے ساتھ پڑا ہوا ہے اور چیخ رہا ہے‘۔

افغانستان میں گزشتہ دو برس میں طالبان کی جانب سے افغانستان کی فوج اور بین الاقوامی افواج پر حملے دوبارہ شروع کرنے کے بعد سکیورٹی ایک بڑا مسئلہ بن گئی ہے۔

اس مہینے کی شروعات میں بھی کابل کے ایک بڑے ہوٹل میں طالبان جنگجوؤں نے حملہ کیا تھا جس میں کم از کم چھ افراد ہلاک ہو گئے تھے۔ ہلاک ہونے والوں میں ناروے کے ایک صحافی سمیت ایک امریکی شہری اور کئی سکیورٹی گارڈز شامل تھے۔

دسبمر میں بھی طالبان کی جانب سے دو خود کش حملے کیے گئے تھے جن میں سے ایک حملے میں 13 افراد جبکہ کابل کے گورنر کی رہائش گاہ کے نزدیک ہوئے حملے میں پانچ افراد ہلاک ہوئے تھے۔