اقوام متحدہ اور یورپی یونین صوبہ ہلمند سے پوست کی کاشت ختم کروانے کی کوشش کر رہے ہیں

کابل میں مقیم اقوام متحدہ کے ایک سینیئر اہلکار اور یورپی یونین کے مشن کے سربراہ پر الزام ہے کہ یہ دونوں افغانستان کی قومی سلامتی کے لیے خطرہ ہیں۔

دونوں عہدیداروں کو افغان حکام نے اس الزام کے بعد ملک سے نکل جانے کو کہا کہ انہوں نے جنوبی صوبے ہلمند میں طالبان کے ساتھ مذاکرات کیے ہیں۔

ایک عہدیدار کا تعلق برطانیہ جبکہ دوسرے کا تعلق آئرلینڈ سے ہے۔ دونوں ہلمند میں تعینات تھے اور افغانستان کے قبائل کے لوگوں سے بات چیت کر رہے تھے۔

افغان حکومت نے انہیں جمعرات تک ہر صورت افغانستان سے چلے جانے کا حکم دیا ہوا ہے۔

افغان صدر حامد کرزئی کے ترجمان ہمایوں حمیدزادہ نے کہا ہے کہ دو غیر ملکوں کو ناپسندیدہ شخصیت قرار دیا گیا ہے اور ان کو ملک چھوڑنے کا کہا گیا ہے جبکہ ان کے مقامی ساتھیوں کو گرفتار کر لیا گیا ہے۔

افغان صدر کے ترجمان نے کہا کہ یہ عہدیدار ایسی سرگرمیوں میں ملوث تھے جو ان کے دائرہ اختیار میں نہیں تھیں۔ اقوام متحدہ اور یورپی یونین افغانستان کےصوبے ہلمند میں پوست کی کاشت کو ختم کروانے کی کوشش کر رہے ہیں۔

افغان حکومت کا فیصلہ غلط فہمی کا نتیجہ ہے اور ہم کوشش کریں گے کہ غلط فہمی دور ہو جائے۔ ہم افغان حکام پر حقائق واضح کر رہے ہیں اور ہمیں امید ہے کہ ہلمند میں اقوام متحدہ کا عملہ کام کرتا رہے گا اقوام متحدہ

اقوام متحدہ کے عہدیداروں کا کہنا ہے کہ افغان حکومت کا فیصلہ غلط فہمی کا نتیجہ ہے اور وہ کوشش کریں گے کہ غلط فہمی دور ہو جائے۔ اقوام متحدہ کے ترجمان علیم صدیقی نے کہا کہ وہ افغان حکام پر حقائق واضح کر رہے ہیں اور انہیں امید ہے کہ ہلمند میں اقوام متحدہ کا عملہ کام کرتا رہے گا۔

کابل میں بی بی سی کے نمائندے ایلسٹر لیتھیڈ کا کہنا ہے کہ ناپسندیدہ قرار دیئے جانے والے ایک عہدیدار افغانستان میں یورپین یونین مشن کے قائم مقام سربراہ ہیں اور وہ افغانستان میں زمینی حقائق جاننے کے لیے مختلف گرہوں سے بات چیت کر رہے تھے۔

حکام کا کہنا ہے کہ مختلف گروہوں سے بات چیت کو طالبان کی حمایت سے نہ تعبیر کیا جائے۔