امریکی افواج پہلی مرتبہ سنہ 2004 میں فلوجہ میں داخل ہوئی تھیں

فلوجہ کے میئر سعد عواد کا کہنا ہے کہ دو ہزار ارکان پر مشتمل شہر کی پولیس فورس وسائل کی شدید کمی کا شکار ہے۔

بی بی سی سے بات کرتے ہوئے سعد عواد کا کہنا تھا کہ’فلوجہ کو استحکام اور سکیورٹی کے حوالے سے دیگر عراقی شہروں کے لیے مثال بنانے کی باتیں ہوتی ہیں لیکن ہماری کاوشیں کمزور پڑ رہی ہیں کیونکہ یہ حکومت ہماری مدد نہیں کرتی‘۔

انہوں نے اندیشہ ظاہر کیا کہ محدود وسائل کی وجہ سے شہر کی پولیس امریکیوں کے چلے جانے کے بعد امن و امان قائم رکھنے میں ناکام رہے گی۔ انہوں نے کہا’ ہم کچھ انوکھی خواہش نہیں کر رہے۔ ہمیں صرف روایتی ہتھیاروں اور گاڑیوں کی ضرورت ہے۔ عوام کو ہلاک رکنے والی مسلح ملیشیا کے مقابلے کے لیے ہمارے پاس کچھ بھی نہیں ہے‘۔

فلوجہ میں امریکی فوج کے سربراہ نے کہا ہے کہ اس حوالے سے شہر کے میئر کے خدشات بے جا نہیں ہیں۔ کرنل رچرڈ سمکاک نے بی بی سی کو بتایا کہ امریکہ فوری طور پر فلوجہ میں تعینات پانچ ہزار میرینز کو وہاں سے منتقل کرنے کا کوئی ارادہ نہیں رکھتا۔ انہوں نے کہا کہ’ دشمن نے ہار نہیں مانی، وہ کوشش کر رہا ہے لیکن ناکام ہو رہا ہے‘۔

فلوجہ سنّی اکثریتی عراقی صوبے انبار کا دوسرا بڑا شہر ہے اور اسے ایک وقت میں امریکی افواج کے خلاف سرگرم سنّی مزاحمت کاروں کا گڑھ سمجھا جاتا تھا۔ امریکی افواج پہلی مرتبہ سنہ 2004 میں اس شہر میں اس وقت داخل ہوئی تھیں جب ایک مشتعل ہجوم نے تین امریکی ٹھیکیداروں کو قتل کرنے کے بعد ان کی لاشیں شہر کی گلیوں میں گھسیٹی تھیں۔

بعد ازاں 2004 میں ہی امریکی افواج نے اس علاقے میں سنّی مزاحمت کاروں کے خلاف ایک آپریشن کیا تھا جس کے دوران شہر کی بیشتر حصہ تباہ ہو گیا تھا۔ اس آپریشن کے دوران شہر کے ہزاروں باسی اس لیے نقل مکانی پر مجبور ہوگئے تھے کیونکہ امریکی افواج نے کہا تھا کہ جو بھی شہر میں رہے گا اسے مزاحمت کاروں کا ساتھی یا ہمدرد سمجھا جائے گا۔