افغان فوجی آپریشن میں اہم کردار ادا کر رہے ہیں

نیٹو حکام کے مطابق افغان اور برطانوی برّی افواج نے موسیٰ قلعہ کے قرب و جوار میں طالبان کے خلاف بھاری گولہ باری کی ہے۔ کہا جا رہا ہے کہ ہیلی کاپٹروں کے ذریعے امریکی فوجیوں کی آمد کے بعد بڑا حملہ کیا جائے گا۔

ادھر طالبان کا کہنا ہے کہ صوبہ ہلمند میں واقع شہر موسیٰ قلعہ کا دفاع ان کے دو ہزار سپاہی کر رہے ہیں۔ طالبان نے اس سال فروری میں موسیٰ قلعہ پر قبضہ کر لیا تھا۔ پورے افغانستان میں موسیٰ قلعہ ہی ایک ایسا قابل ذکر شہر ہے جس پر طالبان کا کنٹرول ہے۔

	موسیٰ قلعہ صوبہ ہلمند میں واقع ہے

طالبان نے ہلمند کے گورنر کی طرف سے ہتھیار پھینکنے کی درخواست کو مسترد کر دیا تھا، جس کے بعد برطانوی اور افغان فوجوں نے مشترکہ طور پر موسیٰ قلعہ پر تین اطراف سے حملے کا آغاز کر رکھا ہے۔ طالبان نے شہر کے دفاع کے لیے بڑی تعداد میں بارودی سرنگیں بچھا رکھی ہیں۔