روس میں تقریباً ایک لاکھ پولنگ سٹیشن بنائے گئے ہیں

ان انتخابات میں گیارہ سیاسی جماعتیں حصہ لے رہی ہیں۔ صدر ولادی میر پیوتن کی منظورِ نظر سب سے بڑی جماعت روسی اتحاد کا کہنا ہے کہ وہ اس بار پھر بھاری اکثریت کے ساتھ عام انتخابات جیتے گی۔

روسی اتحاد کو ان انتخابات میں کمیونسٹ پارٹی، لِبرل ڈیموکریٹِک پارٹی اور یابلوکو پارٹی کی جانب سے چیلنج کا سامنا ہے۔

حزبِ اختلاف کی جماعتوں کا الزام ہے کہ حکومت نے انتخابات سے قبل ان کی مہم میں روڑے اٹکائے اور انہیں شبہ ہے کہ انتخابات کا عمل شفاف نہیں ہو گا۔

انتخابات کا خود مختار جائزہ لینے والے غیر ملکی ماہرین کا کہنا ہے کہ انہیں انتخابی عمل کے جائزے کے دوران مشکلات کا سامنا کرنا پڑ رہا ہے۔ اس سے قبل یورپی یونین کے ماہرین نے یہ کہتے ہوئے انتخابات کا جائزہ لینے سے انکار کر دیا تھا کہ روسی حکام انہیں ویزا دینے میں تاخیر کر رہے ہیں۔

روسی حکومت نے انتخابات میں دھاندلی کے الزامات کو مسترد کیا ہے۔