ریپبلکن پارٹی کےٹکٹ کی دوڑ میں روڈی جولیانی آگے ہیں

مٹ رومنی نے سابق مئر پر الزام لگایا کہ غیر قانونی امیگریشن کے سوال پر ان کی پالیسی نرم ہے لیکن جواب میں روڈی جولیانی کا کہنا تھاکہ مٹ رومنی نے خود اپنے محل نما گھر میں غیر قانوی تارکین وطن سے کام لیا ہے۔

اس مباحثے میں آٹھ امیدوار شریک ہوئے جنہوں نے ویڈیو ویب سائٹ یو ٹیوب استعمال کرنے والوں کی جانب سے پوچھے گئے سوالوں کا جواب دیا۔ یہ بحث سی این این پر دکھائی گئی۔

صدر کے عہدے کے لیے پارٹی کے امیداوروں کے انتخاب میں اب صرف پینتیس دن باقی رہ گئے ہیں۔

قومی سطح پر تو مسٹر جولیانی آگے ہیں لیکن مٹ کو آئیووا اور نیو ہیمپ شر صوبوں میں سبقت حاصل ہے جہاں سب سے پہلے ووٹ ڈالے جائیں گے۔

	بحث میں آٹھ امیدواروں نے حصہ لیا

غیر قانونی امیگریشن کے سوال پر ریپبلکن ووٹرز میں خاص دلچسپی ہے۔ بہت سے لوگ غیر قانونی تارکین وطن کے مسئلے سے نمٹنے کے لیے زیادہ سخت پالیسیوں کے حق میں ہیں اور پارٹی ٹکٹ کے امیدواروں کو چھوٹتے ہی اس سوال سے جوجھنا پڑا۔

مسٹر رومنی نے مسٹر جولیانی پر الزام لگایا کہ جب وہ نیو یارک کے مئر تھے تو انہوں نے شہر کو غیر معمولی تارکین وطن کے لیے ایک محفوظ پناہ گاہ بنا میں تبدیل کر دیا تھا۔

اس پر مسٹر جولیانی نے کہا کہ مسٹر رومنی نے خود اپنے گھر میں ایسے لوگوں سے کام کروایا تھا جو ملک میں غیر قانونی طور پر کام کر رہے تھے۔ جواب میں مسٹر رومنی نے کہا کہ اگر ہر اس شخص سے، جو ’فنی‘ یا عجیب و غریب انداز میں انگریزی بولتا ہو، اس کے دستاویزات مانگی جائیں، تو یہ بالکل ’غیر امریکی‘ طرز عمل ہوگا۔

امیدواروں سے اسقاط حمل، اسلحے پر کنٹرول اور فوج میں ہم جنسوں کی شمولیت پر بھی سوال پوچھے گئے۔

عراق کی جنگ، اور وہاں امریکی افواج میں حالیہ اضافے کے کٹر حامی سینٹر جان میکین اور عراق کی جنگ کے مخالف ران پال میں بھی ٹکراؤ ہوا۔ جنگ کی مخالف سے مسٹر پال کی مقبولیت میں کافی اضافہ ہوا ہے اور انہیں اپنی انتخابی مہم کے لیے لاکھوں ڈالر کی امداد کے وعدے حاصل ہوئے ہیں۔

مسٹر میکین نے مسٹر پال پر الزام لگایا کہ اپنے موقف سے وہ ان باتوں کو فروغ دے رہے ہیں جن کی وجہ سے دوسری جنگ عظیم ہوئی تھی۔

جواب میں مسٹر پال نے سینیٹر میکین سے پوچھا:’ بنیادی سوال جو آپکو پوچھنا چاہیے وہ یہ ہے کہ مجھےاپنی انتخابی مہم کے لیے سب سے زیادہ رقم محاذ جنگ پر تعینات فوجیوں سے کیوں ملتی ہے؟