ہلاک شدگان میں ایک تیرہ سالہ بچہ محمد سوسی بھی شامل ہے

کچھ جھڑپیں رفاہ کے علاقے میں حماس اور اسلامک جہاد کے کارکنوں کے مابین ہوئیں جبکہ غزہ شہر میں ہونے والی جھڑپوں میں حماس اور الفتح کا ایک حامی گروہ مدِ مقابل تھا۔

طبی عملے کا کہنا ہے کہ ہلاک شدگان میں ایک تیرہ سالہ بچہ محمد سوسی بھی شامل ہے جو دو طرفہ فائرنگ کے دوران سر میں گولی لگنے سے ہلاک ہوا جبکہ الفتح کے حامی حلس قبیلے کا ایک فرد بھی دستی بم پھٹنے سے مارا گیا۔

حماس حکام کے مطابق سنیچر کو ہونے والی جھڑپوں کا آغاز اس وقت ہوا جب حلس قبیلے کے لوگوں نے ایک ایسی گاڑی پر گولیاں چلائیں جس میں حماس کے سکیورٹی اہلکار سوار تھے۔عینی شاہدین کے مطابق اس واقعے کے بعد حماس کے نشانہ باز عمارتوں کی چھتوں پر چڑھ گئے جبکہ قبیلے والوں نے علاقے کی سڑکوں پر رکاوٹیں کھڑی کر دیں۔ جھڑپوں کے دوران دونوں جانب سے مارٹر گولوں اور راکٹ کی مدد سے پھینکے جانے والے بموں کا استعمال ہوا۔

ادھر حماس کے ایک سینئر رہنما محمود ظہار نے کہا ہے کہ حماس علاقے میں قانون کی عملداری کے نفاد کے لیے پر عزم ہے۔ ان کا کہنا تھا کہ’ سب لوگ نئی انتظامیہ سے تعاون کریں اور غربِ اردن اور غزہ کے لوگوں کی یہی خواہش ہے کہ حماس ہی ان کی حاکم ہو‘۔

حماس کی جانب سے اس برس جون میں غزہ کا انتظام سنبھالے جانے کے بعد اب تک کی سب سے خونریز جھڑپوں میں جمعرات سے اب تک سات افراد ہلاک ہو چکے ہیں۔ یہ جھڑپیں گزشتہ ہفتے اس وقت شروع ہوئی تھیں جب حماس کی ایگزیکٹو فورس نے الفتح تنظیم کے حامی حلس قبیلے کے ارکان کو گرفتار کرنے کی کوشش کی تھی۔