1951 میں چین اور ویٹکن کےتعلقات خراب ہوگۓ تھے

بیالیس سالہ فادر جوسف لی شان کو تیانانمین سکوئیر کے قریب واقع ایک کتھیڈرل کا بشپ بنایا گیا ہے۔

ان کے پیشرو، فوٹیشان کو چینی حکومت نے ویٹیکن سے اجازت لیے بغیر بشپ بنا دیا تھا جو کہ گزشتہ کئی برسوں چین کی حکومت کی عادت بن چکی تھی۔

جولائی میں ویٹیکن کے وزیر خارجہ کارڈنل ٹارسسکو برتون نے کہا تھا کہ فادر لی اس عہدے کے لئے بہترین ثابت ہوں گے۔

چین نے 1951 میں ویٹکن سے اپنے تعلقات خراب کر لیے تھے اور چین کی عیسائی آبادی دو حصوں میں بٹ گئی تھی۔ ایک حصے کے لوگوں نے پیٹریاٹک چرچ کو ماننا شروع کر دیا جبکہ دوسرے ویٹکن کے وفادار زیرزمین چرچ کو مانتے رہے ہیں۔

اختلافات شروع ہونے کی وجہ یہ تھی کہ پیٹریاٹک چرچ ویٹکن سے بشپ بنانے کے لئے اجازت لینا غیر ضروری سمجھتا تھا۔

مگر پوپ بینیڈکٹ نے اس معاملے کو حل کرنے کے لئے جون میں چین کے کیتھولکس کو صلح کرنے کے لئے خط بھیجا اور ان کے بنائے ہوئے کئی بشپز کو قبول کرنے کا فیصلہ کر لیا۔

لیکن بی بی سی کے نامہ نگار ڈیوڈ ویلی نے روم سے بتایا کے گزشتہ سال دونوں طرف سے معاملہ ناگوار رہا۔ پوپ نے چین کے فیصلے میں ان کو نہ شامل کرنے پر افسوس کیا جبکہ چین نے پوپ سے چین کے اندرونی معاملات میں دخل دینے کی شکایت کی۔