جھڑپوں کے دوران طلباء نے پولیس پر پتھراؤ کیا

منگل کو ہونے والی جھڑپوں میں کم از کم پندرہ افراد زخمی ہوئے۔

ان جھڑپوں کا آغاز ڈھاکہ یونیورسٹی میں طلباء کےگروہ اور یونیورسٹی میں تعینات فوجی یونٹ کے ایک افسر کے دوران تلخ کلامی سے ہوا تھا۔ طلباٹ نے اب یونیورسٹی میں قائم فوجی کیمپ کے خاتمے کے لیے بدھ تک کی مہلت دی ہے۔

حکام کے مطابق یہ جھڑپیں ڈھاکہ اورگردونواح کی تین یونیورسٹیوں کے علاوہ چٹاگانگ اور کشتیہ میں ہوئیں۔ ڈھاکہ میں ہونے والی جھڑپوں میں طلباء نے پولیس پر پتھراؤ کیا اور یونیورسٹی کیمپس میں درجنوں گاڑیوں پر اور مختلف مقامات پر آگ لگا دی۔

مظاہرے کرنے والے طلباء ملک میں جمہوریت کی بحالی کا مطالبہ کر رہے ہیں اور
پولیس کے مطابق مظاہرین نے فوجی سربراہ معین الدین احمد کا پتلا بھی نذرِ آتش کیا۔ پولیس کی جانب سے جواباً مظاہرین پر لاٹھی چارج کیا گیا اور آنسو گیس فائر کی گئی۔

ڈھاکہ میں بی بی سی کے نمائندے ولی الرحمان کا کہنا ہے کہ ماضی میں ضیاء الرحمان اور محمد ارشاد کی سربراہی میں قائم دو بنگلہ دیشی حکومتیں جن مظاہروں کے نتیجے میں ختم ہوئی تھیں ان کا آغاز طلباء نے ہی کیا تھا۔