کان میں پھنسنے والوں کو بچانے کی کوشش جاری ہے

چین کے سرکاری خبر رساں ادارے زنہوا کے مطابق ایمرجنسی ٹیمیں پھنسے ہوئے افراد کو نکالنے کی کوششوں میں مصروف ہیں۔ فوجی دستے اور پولیس بھی امدادی ٹیموں کی مدد کے لیئے موقع پر موجود ہیں۔

زنٹائی شہر دارالحکومت بیجینگ کے جنوب میں 280 میل کی دوری پر واقع ہے۔ سرکاری اہلکاروں نے خبر رساد ادارے سے بات کرتے ہوئے خدشہ ظاہر کیا ہے کہ پھنسے ہوئے افراد کے بچنے کی امید بہت کم ہے۔

چین میں واقع کوئلے کی کانوں کا شمار دنیا کی خطرناک ترین کانوں میں کیا جاتا ہے جہاں ہر سال پانچ ہزار سے زائد کان کن ہلاک ہو جاتے ہیں۔

اس کان کے قریب ہی ایک دوسری کان میں بھی نو افراد پھنسے ہوئے ہیں۔

سرکاری خبر رساں ادارے کے مطابق علاقے میں دو سو پانچ ملی میٹر بارش ریکارڈ کی گئی جس کے نتیجے میں قریبی دریا وین میں سیلاب آ نے سے دریا کا پانی کوئلے کی کان میں داخل ہو گیا اور وہاں کام کرنے والے اندر ہی پھنس کر رہ گئے۔ یہ واقعہ جمعے کے روز مقامی وقت کے مطابق دوپہر دو بج کر تیس منٹ پر پیش آیا۔

ایک مقامی اہلکار زانگ ڈیکون کا کہنا ہے کہ ’حادثے کے وقت کان میں 756 کان کن موجود تھے جن میں سے 584 وہاں سے بچ نکلنے میں کامیاب ہوگئے‘۔