’عراق پر طے شدہ اہداف حاصل کرنے کے لیے دباؤ ڈالتے رہیں گے‘

ریڈیو پر اپنے ہفتے وار خطاب میں صدر بُش نے کہا کہ عراقی حکومت نے ابھی تک بہت سے اہم معاملوں کو حل نہیں کیا جن میں تیل سے حاصل ہونے والی آمدنی کی تقسیم، صوبائی انتخابات کا انعقاد اور سابق حکمران جماعت بعث پارٹی کے ارکان کی حکومت میں واپسی سے متعلق قوانین میں اصلاحات کے معاملات شامل ہیں۔

انہوں نے کہا کہ امریکہ عراقی رہنماؤں پر زور ڈالتا رہے گا کہ وہ ان اہداف کو حاصل کریں جو انہوں نے طے کیے تھا۔ انہوں نے کہا کہ مقامی سطح پر جو پیش رفت اور مصالحت ہو رہی ہے امریکیوں کی اس سے حوصلہ افزائی ہوئی ہے۔

جارج بُش نے کہا کہ ایک امریکی سیاستدان نے ایک بار کہا تھا کہ تمام سیاست مقامی ہوتی ہے۔ ’ایک جمہوریت میں قومی سیاست مقامی حقائق کی عکاسی کرتی ہے اور جب عراق میں مقامی آبادیوں کے درمیان مصالحت ہوتی جائے گی تو اس سے بغداد میں بھی مصالحت کے لیے مناسب حالات پیدا ہونگے۔‘