اقوام متحدہ کی امن فوج پر اس سے قبل بھی جنسی زیادتییوں کے کئی الزامات سامنے آئے ہیں۔

اقوام متحدہ کا کہنا ہے کہ اس نے بواکا میں موجود اپنی فوج کو بیرکوں تک محدود کر دیا ہے۔ یہ نہیں بتایا گیا ہے کہ ان امن فوجیوں کا تعلق کن ممالک سے ہے۔

اقوام متحدہ کے دستوں پر اس سے قبل بھی کئی مقامات پر جنسی زیادتیوں کے الزامات سامنے آتے رہے ہیں جس کے باعث اقوام متحدہ کے سابق سکریٹری جنرل کوفی عنان نے کہا تھا کہ ان الزامات پر ’زیرو ٹالرینس‘ پالیسی اختیار کی جائے گی۔

2006 میں اپنے منصب سے دستبردار ہونے سے پہلے ان کا کہنا تھا کہ ’جنسی استحصال اور زیادتی بداخلاقی ہے اور اقوام متحدہ اس کی شدید مخالفت کرتی ہے اور اس میں ملوث لوگوں کو سزا دی جائے گی‘۔

اقوام متحدہ کا کہنا ہے کہ حالیہ الزامات ایک انکوائری کے بعد سامنے آئے ہیں اور اس بارے میں مکمل انکوئری کی جا رہی ہے۔

اقوام متحدہ کے بیان میں کہا گیا ہے کہ ’ یہ الزامات شدید نوعیت کے ہیں اس لیے اقوام متحدہ نے یہ فیصلہ کیا ہے کہ دستے کی تمام نقل و حرکت کو روک دیا جائے اور اس یونٹ کو اس کی بیس تک محدود کر دیا گیا ہے۔‘

یہ مانا جا رہا ہے کہ اس میں کم عمر لڑکیوں کے ساتھ جنسی زیادتی کے الزامات شامل ہیں۔

اقوام متحدہ نے کہا ہے کہ وہ اس بات کا ذکر نہیں کریں گے کہ اس تفتیش میں شامل دستوں کا تعلق کن ممالک سے ہے۔

اقوام متحدہ کی ویب سائٹ کے مطابق بواکا میں موجود افواج کا تعلق مراکش، پاکستان، بنگلہ دیش اور گھانا سے ہے تاہم یہ بات سامنے نہیں آئے کہ کس ملک کا دستہ شک کے دائرے میں ہے۔ اقوام متحدہ نے معمول کے خلاف اپنے پوری فورس کو علاقے میں ان کے بیرکوں تک محدود کر دیا ہے۔

بی بی سے کے پیٹر مائلز کا کہنا ہے کہ اقوام متحدہ کے اس ردعمل سے یہ اندازہ لگایا جا سکتا ہے کہ اقوام متحدہ کا ادارہ ان حالیہ الزامات پر بہت سنجیدگی سے عمل درآمد کر رہا ہے۔