جمی کارٹر کو سن 2002 میں امن کا نوبل انعام دیا گیا

جمی کارٹر نے بی بی سی کو بتایا کہ مسٹر بلیئر کی صدر بش کی اس قدر حمایت امریکی صدر کے سامنے ان کی تابعداری کا واضح ثبوت ہے۔

ان کا کہنا تھا کہ عراق کے حوالے سے صدر بش کی احمقانہ پالسیوں کی برطانوی حمایت دنیا کے لیے کسی بڑے سانحے سے کم نہیں ہے۔

واضح رہے کہ برطانوی وزیراعظم ٹونی بلیئر اگلے ماہ اپنے عہدے کو چھوڑ دیں گے۔

مسٹر کارٹر کا کہنا تھا کہ بلئیر اگر سن 2003 میں عراق پر قبضے کی بش انتظامیہ کی پالیسی سے خود کو دور رکھتے تو ممکن تھا کہ امریکی سیاست اور رائے عامہ قطعی مختلف ہوتی۔

ان کا کہنا تھا کہ عراق جنگ سے دنیا بھر میں فرقہ پرستی بڑھی۔ انہوں نے امید ظاہر کی کہ عراق جنگ کے معاملے میں گورڈن براؤن امریکی صدر بش کی اتنی زیادہ حمایت سے اجتناب کریں گے۔

سابق امریکی صدر عراق جنگ کے شدید مخالف رہے ہیں۔ گزشتہ سال ایک انٹرویو کے دوران انہوں نے کہا تھا کہ انہیں یہ دیکھ کر مایوسی ہوئی کہ مسٹر بلیئر صدر بش پر اثر انداز ہونے میں ناکام رہے ہیں۔

جمی کارٹر سن 1976 میں جیرالڈ فورڈ کو ہٹا کر اقتدار میں آئے تھے۔ امریکہ کے 39ویں صدر کی حیثیت سے انہوں نے سن 1981 تک اپنے عہدے پر کام کیا۔ سن 2002 میں امن کے لیے کوششوں، سماجی اور معاشی انصاف میں خدمات پر انہیں امن کا نوبل انعام بھی دیا گیا۔