رمضان ملک کے سابق صدر صدام حسین کے بعد پھانسی پانے والے ان کے تیسرے ساتھی ہیں

رمضان اس مقدمے میں شریک ملزم تھے جس میں عراق کے سابق صدر صدام حسین کو پھانسی کی سزا سنائی گئی تھی۔ رمضان کو ابتدائی طور پر عمر قید کی سزا ملی تھی لیکن اپیل کورٹ نے اسے سزائے موت میں تبدیل کر دیا تھا۔

رمضٰان پر الزام تھا کہ وہ بھی سن انیس سو اسی میں دجیل شہر میں ایک سو اڑتالیس شیعہ افراد کی ہلاکت کے ذمہ دار تھے۔

رمضان صدام حسین کے بعد پھانسی کی سزا پانے والے تیسرے بڑے سابق اہلکار ہیں۔ وہ مقدمے کی پوری کارروائی کے دوران اس بات پر مُصر تھے کہ ان لوگوں کی ہلاکت میں ان کا کوئی کردار نہیں۔

رمضان انیس سو تیس کے عشرے میں پیدا ہوئے۔ انہیں سن دو ہزار تین میں موصل میں کرد جنگجوؤں نے گرفتار کر کے امریکی افواج کے حوالے کیا تھا۔

صدام حسین کو تیس دسمبر سن دو ہزار چھ کو پھانسی دی گئی تھی اس کے بعد پندرہ جنوری کو ان کے دو ساتھیوں برزان ابراہیم التکریتی اور اواد احمد بندر کو پھانسی ملی تھی۔