امریکی فوج کی فائرنگ سے پنتیس افراد زخمی ہوئے

اتوار کے روز جلال آباد سے پاکستان جانے والے روڈ پر امریکی فوج کی فائرنگ سے دس شہری ہلاک اور پنتیس زخمی ہو گئے تھے۔

ادھر افغانستان میں حکام کا کہنا ہے کہ صوبہ کپیسہ میں اتحادی فوجوں کی بمباری سے مزید نو شہری ہلاک ہوگئے ہیں۔امریکی فوج نے علاقے میں بمباری کی تصدیق کی ہے لیکن اس کا کہنا ہے کہ ہلاکتوں کے متعلق انہیں صحیح طور پر علم نہیں ہے۔

افغانستان میں موجود امریکی فوج کے حکام کا کہنا ہے کہ گزشتہ روز اتحادی فوج کے ایک قافلے پر خود کش حملے کے بعد فائرنگ کے واقعے میں دس عام شہری ہلاک ہوگئے۔

یہ واقعہ اس وقت پیش آیا جب مبینہ خود کش بمبار نےافغانستان کے مشرقی شہر جلال آباد کو پاکستان ملانے والی شاہراہ پر ایک فوجی گاڑی کو نشانہ بنایا جس کے بعد فائرنگ شروع ہوئی۔

امریکی فوج کے مطابق حملہ آور نے بارود سے بھری ایک منی بس قافلے سے ٹکرانے کی کوشش کی جس سے ایک فوجی زخمی ہوا۔ فوج کے مطابق اس واقعے کے فوراً بعد قافلے پر کئی جانب سے حملہ کیا گیا جس پر فوجی قافلے میں شامل افراد نے اپنے دفاع میں گولیاں چلائیں۔

کابل میں بی بی سی کے نامہ نگار الیسٹر لیتھ ہیڈ کے مطابق مقامی آبادی کا دعوٰی ہے کہ امریکی فوجیوں نے بم حملے کے بعد شہریوں کو نشانہ بنایا۔ اس واقعے کے بعد عام شہریوں کی ہلاکت پر ہزاروں مقامی باشندوں نے مظاہرے بھی کیے۔ مظاہرین امریکی فوجیوں پر راہگیروں کو نشانہ بنانے کا الزام عائد کر رہے تھے۔

اس سے قبل نیٹو کے ایک ترجمان نے بتایا تھا کہ جنوبی افغانستان میں جھڑپوں کے دوران اتحادی فوج کے دو فوجی مارے گئے۔ نیٹو ترجمان نے یہ نہیں بتایا کہ ہلاک ہونے والے فوجیوں کی قومیت کیا ہے اور جھڑپیں جنوبی افغانستان میں کس مقام پر ہوئیں۔ جنوبی افغانستان میں نیٹو کے زیرِ انتظام زیادہ تر فوجیوں کا تعلق برطانیہ اور کینیڈا سے ہے۔ برطانوی فوجیوں کی ایک بڑی تعداد صوبہ ہلمند میں تعینات ہے جبکہ کینیڈا کے فوجی زیادہ تر قندھار میں میں ہیں۔

اس سال افغانستان میں اب تک بیس غیر ملکی فوجی ہلاک ہو چکے ہیں اور خدشات ہیں کہ موسمِ سرما کے اختتام پر طالبان اپنی سرگرمیوں کو تیز کر دیں گے۔