جینی پیرسیویل بی بی سی نیوز، سپارک ہِل

	’ہم سب اتفاق سے رہتے ہیں، یہاں کوئی مسئلہ نہیں‘

باوردی پولیس والے، پولیس کی دو گاڑیاں اور رکاوٹیں لوگوں کو مکتب سے دور رکھے ہوئے ہیں جو اس کے سامنے سے گزرتے ہوئے فٹ پاتھ سے اتر کر سڑک پر چل رہے ہیں۔

ایک پب(شراب خانے) اور بیوٹی سیلون کے بیچ واقع اس دکان کا نام پہلے بھی شہہ سرخیوں میں آ چکا ہے۔

’مکتب‘ معظم بیگ نے شروع کی تھی جو دہشت گردی کے شبہے میں خلیج گوانتانامو میں امریکہ کی قید کاٹ چکے ہیں۔ انہیں برطانوی پولیس نے انسداد دہشت گردی کے قانون کے تحت سن دو ہزار میں گرفتار کیا تھا۔

یہ دکان اب ’معظم بیگ‘ کی نہیں اور اس کے نئے مالک اسامہ بن لادن یا القاعدہ کے ساتھ کسی قسم کے تعلق سے انکار کرتے ہیں۔

اس دکان کے قریب کھڑی ساڑھی میں ملبوس تین لڑکیوں کو برطانوی ہونے کا اتنا ہی احساس ہے جتنا ’فِش اینڈ چپس‘ پر مشتمل ان کا لنچ برطانوی ہے۔ لیکن وہ جانتی ہیں کہ سپارک ہل کے علاقے میں جہاں پولیس نے تازہ ترین کارروائی کی ہے سب ایسا محسوس نہیں کرتے۔

ان میں سے ایک لڑکی نے کہا کہ ’ہم یہاں پیدا ہوئے تھے، یہ ہمارا ملک ہے اور ہم نہیں چاہتے کہ اس کے ساتھ کچھ غلط ہو‘۔

’ہم بھی مسلمان ہیں اور ہمارے مذہب میں دہشت گرد بننے کے لیے نہیں کہا گیا، لیکن کچھ نوجوان لڑکوں کے پاس کرنے کو کچھ نہیں اور ممکن ہے بیوقوفی پر اتر آئے ہوں‘۔

تینوں لڑکیاں دوستانہ انداز سے ملتی ہیں لیکن اپنا نام ظاہر نہیں کرنا چاہتیں اور زیادہ بات کرنے سے بھی گھبرا رہی ہیں۔ ان میں سے جو سب سے بڑی تھی اس نے کہا کہ ’سچ پوچھو تو کوئی بھی کچھ نہیں کہنا چاہتا کہ کیونکہ اسے اسلام کے خلاف سمجھا جا سکتا ہے‘۔

سپارک ہل میں پلے بڑھے ایک چھبیس سالہ ٹریول ایجنٹ نے کہا کہ علاقے کی زیادہ تر مسجدیں اعتدال پسند ہیں۔ انہوں نے کہا کہ مشرق وسطیٰ اور پاکستان سے تعلق رکھنے والے مذہبی رہنما لوگوں کے جنگ مخالف جذبات کا استعمال کرتے ہوئے اسلام کی انتہا پسند شکل کی تبلیغ کر رہے ہیں۔

سپارک ہل برمنگھم شہر کے مرکز سے دو کلومیٹر کے فاصلے پر واقع ہے۔ اس کے بازار میں اسلامی، ساڑھیوں، فاسٹ فوڈ، بالٹی ہاؤس اور حلال کھانے کی دکانیں میں گاہکوں کی توجہ کے لیے مقابلہ ہے۔

مختلف دکانوں میں رسپکٹ پارٹی کی طرف سے ایک جنگ مخالف مظاہرے میں شرکت کی دعوت دی گئی ہے۔ ایک اور جگہ پر حزب التحریر کی جانب سے مسلمان خواتین کو ایک مذاکرے میں شرکت کی دعوت دی گئی ہے جس کا موضوع ہے ’کمیونٹی میں بہتر تعلقات کے لیے اسلام کو غیر مسلموں کے سامنے کیسے پیش کیا جائے؟‘

سٹریٹ فورڈ روڈ بزنس ایسوسی ایشن کے خزانچی عبدل ونات نے کہا کہ انہیں تازہ ترین کارروائی اور اس میں ہونے والی گرفتاریوں سے دھچکہ لگا ہے کیونکہ یہ متحرک علاقہ ہے، یہاں بہت سے مذہبی گروہ موجود ہیں جن میں زیادہ تر مسلمان ہیں۔ ’ہم سب اتفاق سے رہتے ہیں، یہاں کوئی مسئلہ نہیں‘۔

انہوں نے کہا کہ ان گرفتاریوں سے سب کو حیرت ہوئی ہے، اس سے ذرائع ابلاغ میں علاقے کے بارے میں منفی تاثر پیدا ہوگا۔