رفعت اللہ اورکزئی بی بی سی اردو ڈاٹ کام، پشاور

	باڑ لگانے سے پاک افغان سرحد پر رہنے والے عوام تقسیم ہوجائیں گے

کسی نامعلوم مقام سے بی بی سی کے ساتھ بات کرتے ہوئے طالبان کے ترجمان ڈاکٹر محمد حنیف کا کہنا تھا ’پاکستان کی اسی ہزار فوج اگر سرحد پار دہشت گردی نہیں روک پائی تو باڑ لگانے اور بارودی سرنگیں بچھانے کا بھی کوئی فائدہ نہیں ہوگا‘۔

سرحد پر باڑ لگانے کے عمل کو ’کافرانہ‘ سازش قرار دیتے ہوئے ڈاکٹر حنیف کا کہنا تھا کہ پاکستان کے اس اقدام سے سرحد کے دونوں طرف رہنے والے عوام منقسم ہو جائیں گے۔ انہوں نے اس الزام کو بھی رد کیا کہ طالبان جنگجو پاکستان کی سرحد عبور کر کے افغانستان میں حملے کرتے ہیں۔

کوئی فائدہ نہیں  پاکستان کی اسی ہزار فوج اگر سرحد پار دہشت گردی نہیں روک پائی تو باڑ لگانے اور بارودی سرنگیں بچھانے کا بھی کوئی فائدہ نہیں ہوگا ترجمان طالبان

ڈاکٹر حنیف کا اصرار تھا کہ غیر ملکی اور افغان افواج کے خلاف مزاحمت افغانستان کی اندر سے ہورہی ہے۔ انہوں نے کہا کہ سرحد پار شدت پسندی اور دہشت گردی کے الزامات صرف پروپیگنڈہ ہے، جس کا مقصد بقول ان کے طالبان کی افغانستان میں ’غاصب‘ افواج کے خلاف جاری مزاحمت کو روکنا ہے۔

واضع رہے کہ حکومت پاکستان نے حال ہی میں پاک افغان سرحد پر شدت پسندی روکنے کے لیے مخصوص مقامات پر باڑ اور باردوی سرنگیں بچھانے کا فیصلہ کیا ہے۔ تاہم افغانستان میں صدر حامد کرزئی کی حکومت اور اس کے مخالف طالبان دونوں پاکستان کے اس اقدام کی مخالفت کر رہے ہیں۔