یورو فائٹر جو سعودی عرب کو بیچا گیا تھا

برطانوی پریس کے مطابق سعودی عرب نے دھمکی دی ہے کہ اگر تحقیقات جاری رہیں تو وہ یہ معاہدہ ختم کر دے گا۔

الیمامہ کے نام سے جانے والے اس معاہدے پر سابق وزیرِ اعظم مارگریٹ تھیچر کے دورِ حکومت میں دستخط کیے گئے تھے۔

بی بی سی کے مشرقِ وسطیٰ کے تـجزیہ نگار راجر ہارڈی کے مطابق برطانوی حکومت سعودی عرب کے ساتھ تعلقات کو بہت قدر کی نگاہ سے دیکھتی ہے۔

سعودی عرب شرقِ وسطیٰ جیسے ہنگامہ خیز علاقے میں ایک اعتدال پسند، مغرب نواز ملک ہے اور بقول صدر بش کے ’دہشت گردی کے خلاف جنگ‘ میں ایک بڑا اتحادی ہے۔

الیمامہ جس کا مطلب بطخ ہوتا ہے برطانیہ کی طرف سے کیا جانے والا سب سے بڑا اسلحہ کا معاہدہ ہے۔

	کئی بڑی کمپنیاں سعودی معاہدوں پر انحصار کرتی ہیں

برطانوی تاجروں کو یہ معلوم ہے اور وہ اسے قبول بھی کرتے ہیں۔ ان کے خیال میں اگر وہ یہ نہیں کریں گے تو یہ معاہدے ان کے حریفوں مثلاً فرانس کو مل جائیں گے۔

لارڈ گولڈ سمتھ نے اپنے اعلان میں کہا کہ وہ یہ تحقیقات نہ صرف برطانیہ کے تجارتی اور اقتصادی مفاد کو بلکہ مشرقِ وسطیٰ میں برطانوی خارجہ پالیسی اور برطانوی سیکیورٹی کو نقصان سے بچانے کے لیے ختم کر رہے ہیں۔

تاہم نامہ نگار کا کہنا ہے کہ ایسا نہیں لگتا کہ ان تحقیقات کے ختم ہونے کے بعد حکومت پر تنقید ختم ہو جائے۔