مہدی ملیشیا پہلے بھی امریکی فوج سے نبرد آزما ہو چکی ہے۔

اطلاعات کے مطابق امریکی فوجیوں نے شہر کو جانے والی تمام شاہراہوں کو بند کر دیا اور شہر میں انتہائی کشیدگی پائی جاتی ہے۔

شیعہ اکثریت والے شہر دیوانیہ میں ایک امریکی فوج ٹینک کی تباہ کرنے کے واقعے کے بعد شہر میں چار گھنٹے کا کرفیو نافذ کر دیا گیا۔

امریکی فوج کی طرف سے مہدی ملیشیا کے رہنما کفا الغریتی کے گھر پر چھاپے کے بعد شہر میں لڑائی شروع ہو گئی جس میں ایک امریکی ٹینک تباہ کر دیا گیا۔

بی بی سی کے نامہ نگار کے مطابق اگست کے مہینے میں بھی دیوانیہ میں عراقی فوج اور مہدی ملیشیا کے درمیان جھڑپیں ہوئی تھیں۔

ادھر عراق کے دارالحکومت بغداد میں پولیس نے کہا کہ اس کو اکاون لوگوں کو لاشیں ملی ہیں جن کو اغوا کر کے قتل کر دیا گیا تھا۔

عراق کے شہر کرکوک چھتیس گھنٹے کا کرفیو ختم کر دیا گیا ہے جس کے دوران عراقی فوج اور پولیس نے امریکی فوج کی مدد کے ساتھ بڑا آپریشن کیا ہے۔

کرکوک میں کرد، عرب اور ترکمانی باشندے کی اکثریت رہائش پذیر ہے۔ پولیس کا کہنا ہے کہ کرکوک میں آپریشن کے دوران ایک سو اسی لوگوں کو شدت پسند ہونے کے شبے میں گرفتار کیا گیا اورہتھیاروں کی ایک بڑی تعداد برآمد کی ہے۔