افغانستان میں تشدد کے واقعات میں حالیہ مہینوں میں اضافہ ہوا ہے

اس وقت افغانستان میں پولینڈ کے ایک سو فوجی موجود ہیں۔ تاہم اعلان کردہ حالیہ فوجی اگلے سال فروری تک افغانستان نہیں جا سکیں گے۔

بدھ کو بین الاقوامی امن فورس کی مزید فوجی بھیجنے سے متعلق ایک درخواست پر غور کے لیئے بیلجئم میں نیٹو کے رکن ممالک کا ایک اجلاس ہوا تھا۔ بین الاقوامی امن فورس نے افغانستان کے شمالی حصے میں جاری فوجی کارروائیوں کے لیئے مزید پچیس سو فوجی بھیجنے کی درخواست کی تھی۔

ملک کے شمالی حصے میں طالبان مزاحمت کاروں سے جاری گھمسان کی لڑائی میں نیٹو کو کافی جانی نقصان اٹھانا پڑ رہا ہے۔

اس وقت افغانستان میں اٹھارہ ہزار پانچ سو کے قریب غیر ملکی فوجی موجود ہیں۔ اس کے علاوہ امریکی فوج بھی تقریبًااتنی ہی تعداد میں ہیں۔

افغانستان میں تعینات نیٹو کمانڈروں نے فوج کی ایک بٹالین کی درخواست کی تھی تاکہ ان فوجیوں کو طالبان کے ساتھ جاری شدید لڑائی کے دوران حسب ضرورت کمک کے طور پر استعمال کیا جاسکے۔ بی بی سی نامہ نگار

کابل میں بی بی سی کے نامہ نگار کا کہنا ہے کہ افغانستان میں تعینات نیٹو کمانڈروں نے فوج کی ایک بٹالین کی درخواست کی تھی تاکہ ان فوجیوں کو طالبان کے ساتھ جاری شدید لڑائی کے دوران حسب ضرورت کمک کے طور پر استعمال کیا جاسکے۔

شمالی حصے میں موجود فوجی کمانڈر فوری طور پر فوجیوں کی تعیناتی چاہتے ہیں تاکہ علاقے میں جاری کارروائیوں میں تعطل نہ آئے کیونکہ ان کے بقول اس خطے میں لڑائی مزید طول پکڑتی دکھائی دے رہی ہے۔

پولینڈ کی وزارت دفاع کے ایک ترجمان نے فوجیوں کے افغانستان بھیجے جانے کے اعلان کے بعد کہا ہے کہ ’ ہم جانتے ہیں یہ انتہائی خطرناک کام ہوگا‘۔

ان کا کہنا تھا کہ’پولینڈ اس بات سے بخوبی آگاہ ہے کہ نیٹو فورس کو افغانستان میں مزید متحرک ہونے کی ضروت ہے اور اسی وجہ سے ہم نے فوجیوں کی تعداد میں اضافے کا فیصلے کیا ہے‘۔

نامہ نگار کا کہنا ہے کہ پولینڈ کے فوجیوں کے افغانستان پہنچنے تک نیٹو ممالک پر مزید فوجی بھیجنے سے متعلق دباؤ برقرار رہے گا۔

نامہ نگار کے مطابق بین الاقوامی امن فوج کو طالبان کے خلاف اپنی لڑائی موسم سرما کے آغاز سے قبل جیتنی ضروری ہے کیونکہ سردیوں میں لڑائی کا عمل سست پڑ جائے گا لیکن لڑائی جیتنے کے لیئے اسے فوجی قوت میں اضافے کی فوری ضرورت ہے کیونکہ اس کے بغیر طالبان کے خلاف لڑائی مشکل تر ہو جائے گی۔