غیر جانب دار ملکوں کی تحریک کے رکن ممبروں کی تعداد 116 ہے

کیوبا کے نائب وزیر اعظم کارلوس لاج نے واشنگٹن پر الزام لگاتے ہوئے کہا ہے کہ وہ پوری دنیا پر اپنی اجارہ داری قائم کرنا چاہتا ہے۔ انہوں نے کہا کہ ترقی پزیر ملکوں کو زیادہ سے زیادہ کام کرنا چاہیے تاکہ ایک منصفانہ معاشی نظام قائم کیا جا سکے۔

سو سے زائد ملکوں کے وزرائے خارجہ اور سفارت کار غیر جانب دار تحریک کے اجلاس کے آخری علامیہ پر کام کر رہے ہیں۔ان ملکوں اور حکومتوں کے سربراہان ہوانا میں جمعے کو ملاقات کریں گے۔

اس بات کی توقع کی جا رہی ہے کہ اس علامیے میں امریکہ کی خارجہ پالیسی پر تنقید کی جائے گی اور اس کے ساتھ جولائی اور اگست میں اسرائیل کی لبنان پر بمباری کی بھی مذمت کی جائے گی۔ اس کے علاوہ ایران کے جوہری پروگرام کے مسئلے پر بھی ایک الگ بیان دیا جائے گا۔