حسن مجتبی بی بی سی اردو ڈاٹ کام، سان ڈیاگو

	جانیٹا کاسترواپنے بھائی کے اقتدار میں آنے کے پانچ سال بعد بھاگ کر امریکہ آ گئی تھیں۔

فیڈل کاسترو کی بہن نے میامی کےمقامی ٹیلیویژن کو بتایا کہ وہ اپنے بھائی کی صحت کے بارے میں تشویش رکھتی ہیں’ آخر وہ میرا خون ہے اور مجھے اسکی بیماری پر سخت تشویش ہے‘۔

کیوبا میں کیمونسٹ انقلاب کے پانچ برسوں بعد اپنی بھائی صدر فیڈل کاسترو کی مخالفت کر کے انیس سو چونسٹھ میں انکی بہن جانیٹا کاسترو امریکہ بھاگ آئی تھیں اور انہوں نے میامی (فلوریڈا) میں سکونت اختیار کی تھی جہاں لاکھوں کیوبائي جلاوطن آباد ہیں۔

میامی میں فیڈل کاسترو کی بیماری کا سن کر جلاوطن کیوبائی منحرفین کی ایک بڑی تعداد سڑکوں پر نکل آئی ہے اور وہ کیوبا کے جھنڈے لہراتے خوشیاں منا رہے تھے-

تاہم فیڈل کی بہن جونیٹا کاسترو نے میامی کے مقامی ٹیلیویژن پر کہا وہ اپنے ہموطنوں کی ان کے بھائی کی علالت پر خوشیاں منانے پر نہایت ہی افسردہ ہیں اگرچہ وہ کیوبا میں اپنے حکمران بھائیوں اور ان کی حکومت سے سخت اختلافات رکھتی ہیں۔

دوسری طرف امریکی میڈیا نے میامی میں کیوبائی جلاوطنوں کے حوالے سے بتایا ہے کہ وہ کیوبا کی حکومت بدلنے کی کسی بھی کوشش کی امداد وحمایت کریں گے-