اقتصادی ترقی سے مزدوروں کو فائدہ نہیں ہورہا: آئی ایل او

اقوام متحدہ کے اس ادارے کا کہنا ہے کہ ان علاقوں کےمزدوروں کے کام کے اوقات میں اضافہ ہوا ہے جبکہ تنخواہوں اور روزگار کے مواقع میں کمی آئی ہے۔

آیی ایل او کا کہنا ہے کہ بے روزگاری کم کرنا انتہائی اہم ہے کیونکہ اس وقت ایشیا میں ساٹھ کڑوڑ افراد ایسے ہیں جن کی ایک دن کی کمائی ایک ڈالر سے بھی کم ہے۔

آیی ایل او کے ڈپٹی ریجنل ڈائریکٹر لن لین لم نے کہا کہ اقتصادی ترقی کے باوجود ایشیا میں روزگار کے مواقع نہیں بڑھ سکے۔

آئی ایل او کی رپورٹ  دو ہزار پانچ میں ایشیا میں اقتصادی ترقی کی شرح چھ اعشاریہ دو فیصد رہی تاہم ملازمتوں میں صرف ایک اعشاریہ چار فیصد تک اضافہ ہوا جس کےباعث بے روزگاری بڑھ گئی۔

اس رپورٹ کے مطابق آنے والی دہائی میں تقریباً پچیس کروڑ مزید افراد ملازمت کے حصول کے لیے نکل کھڑے ہونگے۔

آئی ایل او کے ڈائریکٹر جوان سوماویہ کا کہنا ہے کہ اقتصادی ترقی اور روزگار کے مواقع کی فراہمی کے درمیان اتنے واضح فرق کی وجہ سے غربت ختم کرنے کی کوششوں میں دشواری پیش آ رہی ہےـ

رپورٹ میں یہ بھی کہا گیا ہے کہ اقتصادی ترقی میں مقابلے کے رجحان کی وجہ سے ملازمتوں کے اوقات کار میں بھی کمی نہیں آئی اور تنخواہوں میں بھی بہتری دیکھنے میں نہیں آئی۔