سنیچر کو بھی کاظمیہ میں سات زائرین کی گولی مار کر ہلاک کر دیا گیا تھا

بغداد میں وزارتِ صحت کے ترجمان نے بی بی سی کو بتایا ہے کہ شہر کے مختلف علاقوں میں زائرین پر مسلح افراد کی فائرنگ سے بیس افراد ہلاک اور تین سو افراد زخمی ہوئے ہیں۔

وزارتِ صحت اور پولیس نے اگرچہ مرنے والوں کی شناخت ظاہر نہیں کی ہے تاہم یہی خیال کیا جا رہا ہے کہ ہلاک شدگان اور زخمیوں میں سے زیادہ تر کا تعلق شیعہ مسلک سے ہے۔

	گزشتہ برس ماتمی جلوس میں خود کش حملہ آور کی موجودگی کی افواہ پر بھگدڑ مچ گئی تھی

رائٹرز نے عراق کے وزیرِ دفاع جنرل عبدالقادر جسیم کے حوالے سے بتایا ہے کہ تیس مشتبہ شدت پسندوں کوگرفتار کر لیا گیا ہے اور زخمیوں میں چودہ پولیس اہلکار بھی شامل ہیں۔

یاد رہے کہ گزشتہ برس كاظميہ مسجد کے قریب امام موسٰی کاظم کی برسی کے جلوس میں بھگدڑ کے باعث ایک ہزار افراد ہلاک ہوگئے تھے اور سنیچر کو بھی کاظمیہ میں سات زائرین کوگولی مار کر ہلاک کر دیا گیا تھا جس کے بعد پولیس نے مزار کے آس پاس کی گلیوں کی ناکہ بندی کر دی تھی۔

ادھر عراقی وزیراعظم نوری المالکی نے علماء سے کہا ہے کہ وہ لوگوں سے کہیں کہ وہ امام موسیٰ کاظم پر اعتقاد رکھنے والے باعقیدہ شیعہ کی حیثیت سے ہر اس چیز کے خلاف متحد ہو جائیں جو فرقہ وارانہ تصادم کو بھڑکاتی ہو۔ یہ بات انہوں نے امام موسٰی کاظم کی برسی پر ایک پیغام میں کہی۔ انہوں نے متنبہ کیا کہ تقریبات کو سیاسی مظاہروں میں تبدیل نہ کیا جائے۔

امام موسٰی کاظم کی برسی کے موقع پر اس سال خصوصی حفاظتی انتظامات کیئے گئے ہیں جن میں خاص طور پر عراقی دارالحکومت میں گاڑیوں پر پابندی کا نفاذ ہے۔