اقوامِ متحدہ کی ابتدائی امن فوج میں فرانس کے فوجی شامل ہوں گے

یہ امن فوج ابتدائی مرحلے میں تقریباً ساڑھے تین ہزار افراد پر مشتمل ہوگی لیکن اس کی تعداد کو پھر پندرہ ہزار تک بڑھا دیا جائے گا جیسا کہ اقوام متحدہ کی جنگ بندی کی قرارداد میں طے پایا ہے۔

لبنان کی صورتحال: خصوصی ضمیمہ

لبنان میں تباہی: خصوصی تصویری ضمیمہ

’فتح‘ پر ایران اور شام کی مبارکباد

اقوامِ متحدہ کی یہ ابتدائی امن فوج علاقے میں پہلے سے موجود اقوامِ متحدہ کے مبصرین اور فوجیوں کے ساتھ کام کرےگی۔ سینئر حکام کے مطابق ابتدائی فوج میں فرانس کے فوجی شامل ہوں گے تاہم بعد ازاں اس میں اسلامی ممالک کے فوجی بھی شامل ہو سکتے ہیں۔

اسرائیل نے کہا ہے کہ وہ دس دن تک اپنی فوج لبنان سے واپس بلا لے گا جبکہ لبنان نے کہا ہے کہ وہ اب اپنے پندرہ ہزار فوجی ملک کے جنوبی حصے میں منتقل کرنا شروع کر دے گا۔ ادھر لبنان میں اسرائیل اور حزب اللہ کے درمیان جنگ بندی کا معاہدہ دوسرے روز بھی قائم رہا تاہم کئی علاقوں سے فائرنگ کی اطلاعات ملی ہیں۔

اسی دوران جنوبی لبنان میں اسرائیل کے انتباہ کے باوجود ہزاروں لبنانی پناہ گزینوں کی واپسی جاری ہے۔ امدادی ایجنسیاں بھی جنوبی لبنان میں خوراک اور ادویات پہنچنانے کی کوشش کر رہی ہیں جبکہ اقوامِ متحدہ نے واپس آنے والے افراد کو ان بموں اورگولوں کی موجودگی سے خبردار کیا ہے جو علاقے میں گرائے گئے مگر پھٹے نہیں۔

	اسرائیل نے کہا ہے کہ وہ دس دن تک اپنی فوج لبنان سے واپس بلا لے گا

سترہ اگست کو کو اقوام متحدہ میں ایک اجلاس میں امن فوج کے حدود کی تفصیلات پر بات چیت کے علاوہ ان ممالک سے مزید بات ہوگی جنہوں نے کہا ہے کہ وہ امن فوج میں اپنے اہلکار بھیج سکیں گے۔

لبنان کے وزیر دفاع الیاس مور نے کہا ہے کہ فوج کچھ دن میں منتقل ہونی شروع ہوگی۔ ان کا کہنا تھا کہ حزب اللہ کو غیر مسلح کرنا لبنانی فوجیوں کا کام نہیں ہے لیکن انہیں پورا یقین ہے کہ لبنانی فوج جب پہنچ جائے گی تو حزب اللہ کے کارکن ان علاقوں سے خود چلے جائیں گے۔

حزب اللہ نے اس جنگ بندی کو ایک بڑی فتح قرار دیا تھا اور شام اور ایران دونوں نے اسے اسرائیل کی شکست قرار دیا تھا۔ اسرائیلی وزیرِخارجہ کا کہنا تھا کہ وہ ایران اور شام کے اشتعال انگیز بیانات کا جواب نہیں دینا چاہتیں لیکن اگر اسرائیل کو پھر کوئی خطرہ ہوا تو وہ اپنے دفاع کے لیئے کوئی بھی اقدامات اٹھا سکتا ہے ۔

اسرائیلی وزیر خارجہ بدھ کو اقوام متحدہ کے سیکرٹری جنرل کوفی عنان سے ملاقات کر رہی ہیں جس میں جنگ بندی پر عمل درآمد پر بات ہوگی۔