ہلمند میں طالبان اور نیٹو افواج میں کئی جھڑپیں ہوئی ہیں

ہلمند میں حکومت کے ترجمان کا کہنا ہے کہ طالبان نے نوزاد گاؤں میں افغان اور غیر ملکی افواج کو حملے کا نشانہ بنایا۔ حملے سے پہلے طالبان نے علاقے کے دکانداروں کا گھیراؤ کر کے انہیں وہاں سے چلے جانے کا حکم دیا تھا۔

اتحادی فوج نے اس حملے کے جواب میں فضائی کارروائی شروع کر دی۔ لڑائی کئی گھنٹوں تک جاری رہی۔

اطلاعات کے مطابق ابتدائی جھڑپ میں سات حملہ آور ہلاک ہوئے جبکہ مزید بارہ افراد اتحادی فوج کی بمباری میں اس وقت مارے گئے جب وہ گاڑی میں موقع سے فرار ہو رہے تھے۔

اس سال جنوبی افغانستان میں تشدد میں نمایاں اضافہ ہوا ہے اور اتحادی افواج کو کافی نقصان ہوا ہے۔

برطانیہ نے حال میں اپنے تین ہزار مزید فوجی جنوبی افغانستان بھیجے ہیں جہاں وہ نیٹو کی افواج کے ساتھ کام کر رہے ہیں۔