قندھار کے مضافاتی علاقے کو طالبان کا گڑھ سمجھا جاتا ہے

قندھار صوبہ کے گورنر کے ترجمان کا کہنا ہے کہ شدت پسندوں نے درجنوں کی تعداد میں میانا شین شہر کے پولیس اسٹیشن پر حملہ کیا۔ ترجمان کا کہنا ہےکہ جھڑپ میں 12 طالبان ہلاک اور چار پولیس اہلکار زخمی ہوئے ہیں۔

ذرائع کے مطابق ہلمند اور ارزگان صوبوں میں بھی طالبان جنگجوؤں سے جھڑپ کی خبریں ہیں۔

حکام کے مطابق جمعہ کی شام میانا شین میں پولیس کے احاطے پر شدت پسندوں نے خودکار رائفلوں اور مشین گنوں سے حملہ کر دیا جس کے بعد لڑائی کئی گھنٹوں تک جاری رہی۔

قندھار کے گورنر کے ترجمان داؤد احمدی نے کہا" ہمارے چار پولیس اہلکار زخمی ہوئے لیکن انہوں نے 12 طالبان جنگجوؤں کو ہلاک کر دیا۔ "

حکام کے مطابق ملک کے جنوبی صوبے ہلمند میں ایک پولیس چیک پوسٹ پر شدت پسندوں نے حملہ کر دیا اس دوران چار پولیس اہلکار زخمی ہو گئے جبکہ 18 شدت پسندوں کو گرفتار کیا گیا ہے جن سے پوچھ گچھ کی جا رہی ہے۔

صوبے کے ترجمان محی الدین نے کہا" ہمیں یقین ہے کہ گرفتار کئیے گئے لوگوں میں سے چھ ایسے ہیں جو حملے میں شامل تھے۔"

ادھر وزارت دفاع کے ذرائع کا کہنا ہے کہ کم سے کم 15 مذاحمت کار اس وقت ہلاک ہو گئے جب فوج نے جنوب میں طالبان جنگجوؤں کے قبضے سے ایک ضلع کو آزاد کرایا۔ بیان میں کہا گیا ہے کہ اس دوران 15 طالبان شدت پسندوں کی لاشیں برآمد ہوئیں جبکہ کم از کم 20 شدت پسندوں کی موت ہوئی۔

شدت پسندوں کے حملے کے بعد قندھار اور ہلمند سب سے زیادہ پر تشدد علاقے سمجھے جانے لگےہیں ۔

دریںاثنا شمالی بغلان صوبے کے دارالحکومت میں بنگلہ دیشی ایجینسی کے افغانی اہلکار کو ہلاک کر دیا گیا۔ ذرائع کا کہنا ہے کہ کسی بین القوامی ایجینسی کے اہلکار کی ہلاکت کا یہ تازہ ترین معاملہ ہے۔