یہ ہلاکتیں اتحادی فوج کی بمباری کے ایک ہی روز بعد ہوئی ہیں جس میں 80 طالبان ہلاک ہوئے ہیں

افغان جنرل رحمت اللہ رؤوفی کا کہنا ہے کہ یہ جھڑپ ارزگان کے صوبے میں منگل کی رات ہوئی۔

یہ ہلاکتیں اتحادی فوج کی بمباری کے ایک ہی روز بعد ہوئی ہیں جس میں 80 طالبان ہلاک ہوئے ہیں۔ اتحادی فوج نے یہ حملہ صوبہ قندھار میں پنجوئی گاؤں پر کیا تھا۔

مقامی افسران کے مطابق ہلمند میں کیئے گئے فضائی حملے میں 16 عام شہری بھی ہلاک ہوئے۔

امریکہ کی سربراہی میں اتحادی فوج نے اس تازہ جھڑپ کے بارے میں ابھی تک کوئی بیان نہیں دیا ہے۔

منگل ہی کو ہلمند میں طالبان جنگجوؤں کے ایک حملے میں کم از کم تین افغان پولیس اہلکار ہلاک ہوگئے تھے۔ یہ ہلاکتیں اس وقت ہوئی تھیں جب طالبان عسکریت پسندوں نے پولیس کے ایک قافلے پر حملہ کیا۔

واردک میں ایک علیحدہ واقعے میں تین افغان ہیلتھ ورکر اور ایک ڈرائیور بم کے حملے میں ہلاک ہوگئے تھے۔

امریکی فوج نے پنچگوئی ہلاکتوں کی ذمہ داری طالبان پر عائد کی تھی اور الزام لگایا تھا کہ وہ جان بوجھ کر شہری علاقوں میں چھپ گئے تھے۔