زخمیوں کو قندھار کے ہسپتال لے جایا گیا

قندھار بمباری: عینی شاہدین کے بیان

امریکی فوج کا کہنا ہے کہ چونکہ طالبان نے گھروں میں گھس کر خواتین اور بچوں کے درمیان پناہ لی اس لیے ان کے خلاف کارروائی میں عام لوگوں کی بڑی تعداد بھی ماری گئی۔

امریکیوں کے دعوے کے مطابق اس کارروائی میں ساٹھ طالبان اور سولہ عام شہری مارے گئے۔

امریکی جنگی طیاروں نے گزشتہ روز جنوبی افغانستان میں مشتبہ طالبان ٹھکانوں پر حملہ کیا تھا۔

اطلاعات کے مطابق یہ حملہ صوبہ قندھار میں پنجوئی نامی گاؤں پر کیا گیا۔ امریکی فوج کے ترجمان کے مطابق اس میں ’50 کے قریب طالبان‘ ہلاک ہوئے ہیں۔ تاہم بی بی سی کے نامہ نگار کوملنے والی خبروں کے مطابق اس حملے میں کم سے کم ’تیس شہری‘ ہلاک اور پچاس زخمی ہوئے۔

عینی شاہدین اور مقامی ڈاکٹروں کا کہنا ہے کہ زخمیوں میں کئی بچے بھی شامل ہیں۔

ایک عینی شاہد عطا محمد نے خبر رساں ایجنسی اے ایف پی کو بتایا کہ دجنوچ عورتوں اور بنشور خان بمباری آدھی رات کے بعد شروع ہوئی اور صبح تک جاری رہی۔ محمد عطا اپنے آٹھ رشتہ داروں کو ہسپتال لے کر آئے تھے اور ان کا کہنا تھا کہ انہیں نے گاؤں میں کم سے کم چویس لاشیں دیکھی تھیں۔

ایک اور عینی شاہد نے بتایا کہ حالیہ جھڑپوں کے بعد طالبان نے ایک مقامی مدرسے میں پناہ لے لی تھی۔ حاجی اخلاف نے بتایا کہ’مدرسے پر بمباری ہوئی تو یہ لوگ بھاگ کر قریبی گھروں میں چلے گئے، اور پھر ان گھروں پر بمباری شروع ہو گئی۔‘

امریکی قیادت میں کثیر ملکی افواج نے اس علاقے کی ناکہ بندی کر دی ہے اور وہاں موجود افراد کی تفتیش جاری ہے۔ امریکی فوج کے ایک بیان میں کہا گیا ہے کہ آپریشن کا مقصد یہاں سر گرم طالبان مزاحمتکاروں کو پکڑنا ہے۔ بیان میں کہا گیا ہے کہ ’یہ افراد طالبان کے سرگرم کارکن تھے اور یہ افغان اور کثیر ملکی افواج کے علاوہ شہریوں پر حملے کرتے رہے ہیں۔‘

یہ فضائی حملہ قندھار کے اس علاقے پر کیا گیا ہے جہاں حال میں طالبان اور افغان سکیورٹی افواج کے درمیان لڑائی میں تقریباً سو افراد مارے گئے تھے۔

ہلمند اور قندھار میں گزشتہ دو روز سے شدید جھڑپیں جاری تھیں جس میں 16 افغان فوجی ہلاک بتائے جاتے ہیں۔

حکام کا اندازہ ہے کہ پچھلے ایک ہفتے میں اس علاقے میں طالبان کے دو سو کے قریب افراد ہلاک ہوئے ہیں۔