اسرائیلی حملوں میں اب تک متعدد فلسطینی شہری ہلاک ہو چکے ہیں

اسرائیل کے فوجی حکام کا کہنا ہے کہ حملے کا نشانہ بننے والا شدت پسند گروہ اسرائیل پر راکٹ حملوں کی منصوبہ بندی کر رہا تھا۔

تازہ حملے اسرائیلی وزیراعظم ایہود اولمرت کے اس بیان کے بعد کیئےگئے ہیں کہ جس میں انہوں نے کہا تھا کہ اسرائیلی فوج مغوی سپاہی کی رہائی تک غزہ پر حملے جاری رکھےگی۔

اسرائیلی حملوں کے نتیجے میں متعدد فلسطینی مارے جا چکے ہیں اور ان حملوں سے شہر کا نظم ونسق بگڑ گیا ہے۔

فلسطینی سکیورٹی ذرائع کا کہنا ہے کہ حملےکا نشانہ بننے والے گروہ میں حماس سمیت فوج کے کئی دھڑوں کے اہلکار شامل ہیں۔

اتوار کو اسرائیلی فوج نے ایک عمارت کو نشانہ بنایا جس کے بارے میں اس کا کہنا تھا کہ شدت پسند گروہ اسلامی جہاد کے کارکن اس عمارت کو ہتھیار رکھنے کے گودام کے طور پر استعمال کرتے تھے۔

فلسطینی ذرائع کا کہنا ہے کہ قرنی کی سرحد کے قریب اسرائیلی فوج کے ایک اور حملے میں تین شدت پسند زخمی ہو گئے جبکہ یہودی آبادی پر فلسطین کے دو راکٹ حملوں میں ایک اسرائیلی شہری زخمی ہوگیا۔

یہ حملے اسرائیلی وزیراعظم کے حماس کی جانب سے جنگ بندی کی پیشکش ٹھکرائے جانے کے بعد کیئے گئے ہیں۔