اسرائیلی فوج نے غزہ میں ساتویں دن بھی کارروائیاں جا ری رکھیں

ترجمان نے فرانسیسی نیوز چینل پر بتایا کہ’ ہم جانتے ہیں کہ تاحال گیلاڈ شلٹ زندہ ہیں تاہم وہ زخمی بھی ہیں اور چند دن قبل ایک فلسطینی ڈاکٹر نے ان کا معائنہ کیا تھا‘۔

مہلت کے اختتام پر کارپول گیلاڈ شلٹ کو اغواء کرنے والےگروپوں میں سے ایک نے کہا تھا کہ وہ اسرائیلی فوجی کو ہلاک نہیں کریں گے تاہم اب مزید بات چیت کا کوئی امکان باقی نہیں ہے۔

غزہ میں فلسطینی گروپوں کی طرف سے اسرائیلی فوجی کی رہائی کے لیئے دی جانے والی مہلت منگل کی صبح ختم ہو گئی تھی۔گزشتہ شب حماس کی عسکری تنظیم نے جو کہ اس اسرائیلی فوجی کے اغواء کرنے والے تین گروپوں میں شامل ہے کہا تھا کہ اگر اسرائیل مقامی وقت کے مطابق صبح چھ بجے تک فلسطینی قیدیوں کی رہائی شروع نہیں کرتا تو اس کے فوجی کی زندگی خطرے میں ہے۔

تاہم حماس کی حکومت کے ترجمان غازی حماد نے دانش مندی اور ہوش سے کام لینے کی ضرورت پر زور دیا تھا۔حماس حکومت کے ترجمان غازی حماد نے کہا تھا کہ اسرائیلی فوجی کی زندگی کی حفاظت کرنی چاہیے اور اس مسئلہ کو سفارتی طریقوں سے حل کیا جانا چاہیے۔انہوں کہا کہ وہ سمجھتے ہیں ابھی اس مسئلے کو حل کرنے کا وقت ہے۔

	جامعۂ اسلامیہ کی عمارت میں حملے کے بعد آگ لگ گئی

دریں اثناء اسرائیلی فوج نے غزہ میں ساتویں دن بھی کارروائیاں جا ری رکھیں اور غزہ کی پٹی پر منگل کو علی الصبح دو میزائل فائر کیئے گئے جس میں ایک شخص ہلاک ہو گیا۔

پہلی میزائل حملہ بیت اللیہہ کے علاقے ہوا جس میں ایک شخص ہلاک اور ایک زخمی ہوا۔ اسرائیلی ذرائع کا کہنا ہے کہ یہ افراد اسرائیلی علاقوں میں دھماکہ کرنے کی تیاریوں میں مصروف تھے۔ اس حملے کے دو گھنٹے بعد ایک میزائل غزہ شہر جامعۂ اسلامیہ کی ایک عمارت سے ٹکرایا۔

فلسطینی شدت پسندوں کی طرف سے ایک ہزار فلسطینی قیدیوں جن میں عورتیں اور بچے بھی شامل ہیں کی رہائی کے مطالبے کو فلسطین میں عوامی سطح پر بہت حمایت حاصل ہے۔تاہم اسرائیلی حکومت کے رویے میں کوئی نرمی نہیں آئی ہے اور شدت پسندوں سے فوجی کی رہائی کے لیئے کوئی مفاہمت کرنے کو تیار نہیں ہے۔ اسرائیل کے کچھ مبصرین کا خیال ہے کہ شدت پسند صرف گیدڑ بھپکیاں دے رہے ہیں کیونکہ اور وہ اسرائیل فوجی کو کوئی نقصان نہیں پہنچائیں گے۔