اتوار کو بغداد میں کار بم دھماکے میں تین افراد ہلاک ہوگئے ہیں

پولیس کا کہنا ہے کہ محمودیہ کے ایک بازار میں ہونے والا دھماکہ اس وقت ہوا جب خریداروں کی ایک بڑی تعداد بازار میں موجود تھی۔ یہ حملہ بغداد کے شیعہ اکثریتی علاقے میں کار بم دھماکے کے ایک دن بعد ہوا ہے جس میں ساٹھ افراد ہلاک ہو گئے تھے۔

عینی شاہدین نے اتوار کو بغداد کی گلیوں میں راکٹ اور گولیاں برسائے جانے کی بھی اطلاعات دی ہیں۔

ایک سکیورٹی اہلکار نے خبر رساں ادارے اے ایف پی کو بتایا کہ محمودیہ کے بازار میں کھڑی ایک گاڑی میں بم نصب تھا جس کے بعد ایک مارٹر بھی فائر کیا گیا۔

عراق میں اتحادی فوج کے قبضے کے تین سال کے دوران بغداد مزاحمت کاروں کے حملوں کا خاص نشانہ رہا ہے۔

اس سے قبل عینی شاہدین نے بغداد کے سنی علاقے ادہامیہ میں جھڑپوں کی اطلاعات بھی دی ہیں۔ پولیس کا کہنا ہے کہ اس علاقے میں دس مارٹر بم فائر کیے گئے۔ ابتدائی اطلاعات میں یہ واضح نہیں ہے کہ ان حملوں کے پیچھے کس کا ہاتھ ہے۔

ادہامیہ بغداد کے ’صدر‘ شہر کے قریب واقع ہے اور اس میں سنیوں کی کئی زیارت گاہیں واقع ہیں۔

وزیر اعظم نورالمالکی کی تمام تر کوششوں کے باوجود بغداد میں فرقہ واریت عروج پر ہے۔ وہ مختلف دھڑوں کے درمیان پائی جانے والی فرقہ واریت کے خاتمے کے لیئے ان دنوں قومی اتحاد کے منصوبے پر سیاسی رہنماؤں کو متفق کرنے کی کوششیں کر رہے ہیں۔