جیریمی بوئن بی بی سی، مشرق وسطٰی

	اسمٰعیل ہانیہ کو مزید گہرے بحران کا سامنا ہوسکتا ہے

فلسطینی وزیر اعظم اسمٰعیل ہانیہ پر ہر طرف سے دباؤ میں اضافہ ہورہا ہے۔ اس اغوا میں حماس کا ملوث ہونا یورپی یونین اور امریکہ کے ان خیالات کو تقویت دے گا کہ حماس ایک ’دہشتگرد‘ تنظیم ہے۔

اسرائیلی سرحد پر فوجی چوکی پر کیے گئے حملے سے قبل خیال کیا جارہا تھا کہ اسمٰعیل ہانیہ اس دستاویز کو قبول کرلیں گے جس کے تحت اسرائیل کو ایک ریاست کا درجہ حاصل ہے۔ اب خدشہ ہے کہ موجودہ حالات اسمٰعیل ہانیہ کو مزید گہرے بحران میں دھکیل دیں گے۔

اسرائیلی فوجی ٹینک پر حملے کو صرف حماس ہی نہیں بلکہ بیشتر فلسطینی جائز سمجھتے ہیں۔ اور اسے شام میں ملک بدر کیے گئے حماس کے رہنماؤں کی حمایت بھی حاصل ہوگی۔

بلیک میل نہیں ہوں گے  بلیک میل نہیں ہوں گے اور اگر ہمارے فوجی کو ہلاک کیا گیا تو کوئی بہت بڑا قدم اٹھائیں گے۔ اسرائیل

ان کے لیئے فی الوقت بہترین حل قیدیوں کا تبادلہ ہوسکتا ہے۔ لیکن اسرائیل کا کہنا ہے کہ وہ ’بلیک میل نہیں ہوگا اور اگر ان کے فوجی کو ہلاک کیا گیا تو وہ کوئی بہت بڑا قدم اٹھائیں گے‘۔

فلسطینی صدر محمود عباس نے بھی اسمٰعیل ہانیہ پر دباؤ بڑھا دیا ہے کہ اسرائیلی فوجی کو رہا کروایا جائے۔ ان کے خیال میں حملے اور اغوا کے اقدامات منفی نتائج کا باعث ہوتے ہیں۔ مگر ان کے اپنے بہت سے مسائل ہیں۔

اگر وہ فوجی کو رہائی نہ دلوا سکے تو محمود عباس کے اسرائیل کے ساتھ مذاکرات کے امکان بہت کم ہوجائیں گے۔ یہ صورتحال اسرائیلی حکومت کے لیئے بھی بڑا چیلنج ہے۔

اسرائیلی حکومت نے سکیورٹی ایجنسی ’شن بیت‘ کی اس رپورٹ کے بعد تحقیقات کا آغاز کیا ہے جس کے مطابق حکومت کو فلسطینی حملے سے قبل اس کے بارے میں آگاہ کردیا گیا تھا۔