’ہم ہر کسی تک پہنچیں گے چاہے وہ کہیں بھی ہو‘

یروشلم میں انہوں نے اپنے خطاب میں کہا کہ’ اسرائیلی فوجی غزہ میں فلسطینی شدت پسندوں کے خلاف کارروائی کے لیئے تیار ہے اور میں یہ بات واضح کردینا چاہتا ہوں کہ ہم اس سلسلے میں ہر کسی تک پہنچیں گے چاہے وہ کہیں بھی ہو‘۔

اس سے قبل اسرائیلی ریڈیو نے مغوی اسرائیلی فوجی کی رہائی کی کوششوں میں مصروف مصری ٹیم کے حوالے سے بتایا تھا کہ مصری ٹیم اغواکنندگان سے رابطے میں ہے۔ ریڈیو کے مطابق یہ رابطہ ایک تیسرے فریق کی مدد سے کیا گیا ہے اور اطلاعات کے مطابق کارپورل گیلد شیلٹ زخمی ہیں۔

اسرائیلی حکومت نے بھی خبردار کیا ہے کہ اگر ان کے فوجی کو نقصان پہنچا تو تو اس کی ذمہ داری حماس حکومت پر ہوگی اور اس کے رہنماؤں کو قتل بھی کیا جا سکتا ہے۔

سنہ 1994 کے بعد یہ پہلا موقع ہے کہ کسی اسرائیلی فوجی کو فلسطینی شدت پسندوں نے اغواء کیا ہو اور یروشلم میں بی بی سی کے نمائندے کا کہنا ہے کہ اسرائیل میں اس اغواء کو ایک بحران کے طور پر دیکھا جا رہا ہے۔

	کارپورل گیلد شیلٹ کو اتوار کی صبح فلسطینی شدت پسندوں نے اغوا کیا تھا۔

حماس کے سیاسی رہنماؤں نے اس واقعے سےمکمل لاعلمی کا اظہار کیا ہے اور عوامی سطح پر اسرائیلی فوجی سے بہتر سلوک اور اس کی رہائی کی اپیل بھی کی ہے۔ تاہم ابھی تک کسی گروہ نے اس اغواء کی ذمہ داری قبول نہیں کی ہے۔

فلسطین کے صدر محمود عباس سوموار کو بھی وزیراعظم اسماعیل ہنیہ سے ملاقات کر رہے ہیں۔ انہوں نے اتوار کو اپنے ایک بیان میں حماس پر زور دیا تھا کہ وہ کارپول گیلد کی رہائی کے لیئے کوششیں کرے کیونکہ ان کا اغواء فلسطین کے قومی مفادات کے لیئے نقصان دہ ہے۔

کارپورل گیلد شیلٹ کو اتوار کی صبح فلسطینی شدت پسندوں نے غزہ کی پٹی پر ایک چھاپہ مار حملے میں اغوا کر لیا تھا۔ اتوار کی صبح غزہ کی پٹی میں اسرائیلی فوجی چوکی پر حملہ کے نتیجے میں کم از کم چار افراد ہلاک ہوئے تھے جن میں دو اسرائیلی فوجی اور دو فلسطینی شامل ہیں۔

اسرائیل کے مطابق یہ حملہ کریم شالوم کراسنگ کے نزدیک کیا گیا۔ حکام کے مطابق حملہ تین سو فٹ لمبی ایک سرنگ کھود کر کیا گیا۔ اسرائیلی ترجمان کےمطابق اس حملے میں دو اسرائیلی فوجی زخمی بھی ہوئے ہیں۔ اسرائیلی فوج کے مطابق حملہ اینٹی ٹینک میزائیل سے کیا گیا جس کے بعد فائرنگ کا تبادلہ شروع ہوگیا۔