سابق صحافی ایوان رڈلی مشرقی لندن میں لوگوں سے مل رہی ہیں

چھاپے میں دو سو پچاس پولیس افسروں نے حصہ لیا جن میں سے کئی کیمیائی ہتھیاروں سے بچاؤ کے لباس پہنے ہوئے تھے۔ کارروائی کے دوران ایک شخص کو گولی لگ گئی اور اسے اور اس کے بھائی کو حراست میں لے لیا گیا۔

پولیس کا کہنا ہے کہ یہ چھاپہ ’خاص اطلاع‘ ملنے کے بعد مارا گیا ۔ لیکن گھر سے ابھی تک ایسا کوئی کیمیائی مادہ یا آلہ نہیں ملا ہے جس کا سکیورٹی سروسز کو خدشہ تھا۔

بی بی سی کے نامہ نگار کرسپن تھورولڈ کے مطابق ابھی تک دونوں بھائیوں کی حراست اور گھر کے گھیراؤ کی وجہ سے مقامی مسلم برادری میں کافی تشویش پائی جا رہی ہے۔

مقامی کونسلر اور الائنس آف مسلم ایسوسی ایشن کے رکن ڈاکٹر ذوالفقار کہتے ہیں کہ ’لوگ چھاپے کی بنیاد، خفیہ اطلاع کی ایمانداری، اور گولی چلائے جانے پر ہی سوالات اٹھا رہے ہیں۔ آپ بتائیں کہ کیوں کسی شخص پر گولی چلائی گئی جب کہ گھر کے اندر اسلحہ ہی نہیں تھا‘۔

	پولیس کے ہاتھ میں ابھی تک کوئی ثبوت نہیں آیا

انہوں نے کہا کہ ’یہ بالکل واضح ہے کہ گیارہ ستمبر کے واقعات کے بعد مسلم برادری کو نامناسب طریقے سے نشانہ بنایا گیا ہے۔ تین ہزار سے زائد مسلم گھروں پر چھاپہ مارا گیا ہے، انسدادِ دہشت گردی کے ظالمانہ قوانین کے تحت نو سو پچاس مسلمانوں کو گرفتار کیا گیا ہے، اور ان سب کے بعد ایک درجن سے کم لوگوں کو سزائیں دی گئیں ہیں جن میں سے اکثر اپیل کے مراحل میں ہیں‘۔

پولیس کو کئی برطانوی شہریوں کی حمایت حاصل ہے جن میں وزیرِ اعظم ٹونی بلیئر بھی شامل ہیں جنہوں نے کہا ہے کہ وہ ایک سو ایک فیصد پولیس کی حمایت کرتے ہیں۔ تاہم لندن کی میٹرو پولیٹن پولیس کے کمانڈر سٹیو ایلن کے مطابق پولیس کو مقامی برادریوں کی بھی حمایت چاہیئے۔