عراقی وزیرِ اعظم عندیہ دے چکے ہیں کہ جلد ہی ملک کے کچھ حصووں کا کنٹرول عراقی فوج کے حوالے کیا جا سکتا ہے

حکام نے بتایا کہ بظاہر ایسے معلوم ہوتا ہے کہ یہ بم مسجد کے قریب ایک موٹر سائیکل پر نصب کیا گیا تھا۔

اس سے قبل پولیس کمانڈوز پر ایک حملہ ہوا تھا جس میں مشرقی بغداد میں پانچ افراد ہلاک ہوگئے تھے۔

ایک دوسرے دھماکے میں بھی جو صدر کے علاقے میں ہوا، پانچ افراد مارے گئے تھے۔ یہ علاقہ جو بغداد کے شمال مشرق میں واقع ہے تقریباً بیس لاکھ شیعہ رہتے ہیں۔

ان واقعات کے علاوہ تین اشخاص اس وقت مارے گئے جب مسلح افراد نے ان کی گاڑی پر گولیاں داغ دیں۔ یہ لوگ کام کی تلاش میں بعقوبہ جا رہے تھے۔

پولیس کا کہنا ہے کہ یہ افراد شیعہ اکثریتی آبادی والے علاقے سے آئے تھے۔

تشدد کے یہ تازہ ترین واقعات بغداد میں گزشتہ روز برطانوی وزیرِ اعظم ٹونی بلیئر کی آمد اور عراقی وزیرِ اعظم المالکی سے ان کی ملاقات کے اگلے روز رونما ہوئے ہیں۔

دونوں وزرائے اعظم نے اپنی بات چیت میں اس بات پر اتفاق کیا تھا کہ اسی برس عراقی فوج کو عراق کے کم از کم کچھ حصووں کا کنٹرول سونپ دیا جائے۔ برطانوی وزیرِ اعظم کا خیال تھا کہ ایسا اگلے چند ماہ میں ممکن ہو سکے گا لیکن ان کے عراقی ہم منصب نے امید ظاہر کی تھی کہ عراقی فوج کو کچھ حصووں کا کنٹرول اگلے چند ہفتوں میں دیا جا سکتا ہے۔