ترک وزیراعظم پر تنقیدی جملے اتاترک میوزیم میں لکھے ہوئے تھے

ترک وزیر اعظم رجب طیب اردگان جب یونان کے شہر سولانکی کے اس میوزیم کے دورے پر گئے تو انہیں یہ الفاظ پڑھ کر اتنا غصہ آیا کہ انہوں نے ’وِزیٹرز بُک‘ میں سے متعلقہ صفحات پھاڑ ڈالے۔

ترک وزیراعظم پر بیاسی سالہ مصنف نے ’امریکہ کا غلام ‘ ہونے کا الزام لگایا تھا اور کہا تھا کہ مسٹر اردگان کی جماعت اپنے مفاد کے لیے ترکی میں مذہبی جذبات اکسا رہی ہے۔ مصنف کا کہنا تھا کہ مذہب کو اس طرح استعمال کرنا سیکیولر ترکی کے اصولوں کے خلاف ہے۔

اطلاعات کے مطابق مصنف محمد فتحی دوردونچو اور حکومت دونوں ایک دوسرے کے خلاف قانونی کارروائی کرنے کا سوچ رہے ہیں۔

ترکی کے وزیر انصاف نے کہا ہے کہ مصنف کی یہ تنقید کسی غیر قانونی تنظیم کے بیان جیسی ہے اور ان کے خلاف مقدمہ چلانا مناسب ہوگا۔

دونوں جانب سے تلخ بیانات کا سلسلہ جا ری ہے۔